Shillong, Lber, 10: Ka Civil Hospital Mawkyrwat kaba don ha South West Khasi Hills District ka la nang paw bha ha ka jinglah ban ai jingsumar kaba paka ïa ki paidbah na ki shnong bapher bapher kiba hap hapoh kane ka District.
Ki doktor kiba shakri ha Civil Hospital Mawkyrwat ki la lah ban pynkoit ïa ka jingpang jong ka Kong Anjellos Lyngkhoi, ka longkmie kaba don 50 snem ka rta na ka shnong Ngunraw, ka shnong kaba hap hapoh ka South West Khasi Hills District kaba jngai kumba 27 kilometre ka shnong Mawkyrwat. Ha ka jingïakren bad ki lad pathai khubor, ka kong Anjellos ka la pynpaw ïa ka jingsngewkmen kaba khraw hadien ba ka la ïoh jingtip ba ka jingpang jingshitom kaba don hapoh ka met jong ka la lap ha ka por kaba biang.
Ka la ïathuh ruh ba ka jingshitom ka la ban ïa ka met jong ka naduh u bnai Ïaïong jong u snem 2024 ha ki bnai baladep ka la pyrshang ban wad jingsumar na kiwei ki doktor hynrei kam shym la ïoh jingïarap satia.
Kumta lyngba ka jingmut jong ki para shnong ka Kong Anjelos la leit ban ïakynduh ïa u Dr. Suting ha kaba la lap ba ka don ïa u Cyst hapoh ka met jong ka.
Ha ka 6 tarik, Lber, 2025 la puit ïa ka bad ki doktor ki la sei ïa u Cyst uba khia haduh 5.7 kilo bad mynta kane ka longkmie ka la don hapdeng ka met kaba koit kaba khiah bad ka jingsngew sting ka met ka phad.
