Shillong, Lber, 11: Ka Iingbishar Meghalaya High Court ha ka sngi Baar ka la bthah ïa ka Central Bureau of Investigation (CBI) ban pynbiang ïa ka thup ba khatduh jong ki nongsakhi ha ka jyrsieh thungkam nonghikai jong u snem 2009.
Haba pynmih ïa ka hukum ka Bench ba la khlieh da u Chief Justice IP Mukerji ka la ong, “ha kum kito ki khep, mynta ka sngi kane ka Iingbishar ka la ka ïaid shakhmat ban bishar ïa ka jingujor bakongsan katkum ka kyndon 482 jong ka Criminal Procedure Code ban pynduh noh ïa ka jingbishar. Ïa mynta, ka Trial Court kan pynsangeh noh ïa ka jingbishar khnang ba ka CBI kan dup lah ban pynbiang ïa ka thup ba khatduh jong ki nongsakhi ban shah bishar. Ynda la bishar bniah ïa kane ka thup ka Trial Court ka lah ban ïaid shakhmat bad bishar bniah shuh shuh ïa ki nongsakhi bad ka jingbishar.”
“Da ka hukum kaba kham mynshuwa, ban pynthikna ïa ka jingbishar kaba stet, kaba hok bad kaba khlem pynslem, nga la ïohi ba dei ban pynduna ïa ka jingdon ki nongsakhi bad ban shim thik tang ïa ki nongai sakhi ba donkam ban pynshisha ïa ka mukotduma bad ïa ki nongsakhi bym da donkam lah ban iehnoh shwa,” ong u Chief Justice.
Ha ka jingbishar, u DSGI Dr N Mozika u la aiti ïa ka thup ba 492 ngut ki nongsakhi. 28 ngut na ki ladep ban bishar haduh mynta.
Ka Hukum ka ong ba u Counsel ula pyntip ba ka jingbishar ka la rai ban weng noh ïa ki 200 ngut ki nongsakhi bad ban eksamin tang ïa ki 292 ngut ha kaba 28 ladep eksamin bad bynrap ruh ba ka jingtyrrwa jong ka jingbishar ka dang ap ïa ka jingmynjur na ka CBI Headquarter kaba don ha New Delhi.
Ka Iingbishar ka la pynpaw ruh namarba ka thup jong ki nongsakhi ym shym la lah ban shim rai da ka CBI, ïa kane ka kam la pynsangeh shwa tad haduh ka 20 tarik, Rymphang 2025 haduh kane ka sngi.
“La ailad ïa u DSGI ban bteng ïa ka jingeksamin ïa ki nongsakhi na ka bynta ban pynstet ïa ka jingbishar. Ka dei ka kam kaba pynlyngngoh ba naduh u Nohprah, 2024, ka CBI ka shu shong halor ka thup kyrteng ki nongsakhi ban eksamin khlem da shim rai khatduh hynrei ka kwah pat ban pynstet ïa ka jingbishar,” ong ka Hukum bad bynrap ruh ba donkam ïa ka jingbishar kaba beit bad kaba stet. Ka long ruh kaba donkam ba ki nongshah kynnoh kin tip ïa ka kyrteng bapura jong ki nongsakhi ki ban sa shah eksamin khnang ba kin dup lah ban ïada ïalade.
