Shillong, Lber, 11: U Myntri Rangbah ka Jylla Conrad K. Sangma ha ka sngi Baar u la ïakynduh ïa ki nongïalam ka Khasi Students Union (KSU), ha ryngkat ka jingdonlang jong u Symbud Myntri Rangbah ba khmih ïa ka tnat Kam Pohing Bah Prestone Tynsong ban ïathir ïatai halor ka jingpyrshah ban pyntreikam ïa ka Meghalaya State Investment Promotion & Facilitation Act, 2024.
Kane ka aiñ ba la long aiñ ha u Lber 2024, ka thmu ban kyntiew bad ban plie lad ïa ka jingbei pisa sha ka Jylla Meghalaya. Halor ka jingpyrshah na ki paidbah, ka Sorkar ka la tyrwa ban wanrah ïa ki jingpynbeit thymmai, kiba pynthikna ba ka Aiñ kam dei ban pynjngut ïa ki kyndon jong ka ‘The Meghalaya Transfer of Land (Regulation) Act, 1971 lane ban ïaid lait ïa ki Autonomous District Council.
Ki jingpynbeit thymmai ba la tyrwa da ka Sorkar ki long, ban pynthikna ba ka Aiñ kam dei ban iuhroit ïa ki kyndon jong ka The Meghalaya Transfer of Land (Regulation) Act, 1971.
Ka jingtyrwa ban pynbeit thymmai kan pynthikna ba ka Aiñ kan ym ïaid lait ïa kino kino ki kyndon jong ki Autonomous District Council.
Ban ïada ïa ka trai ri ha ki lad ïohkam ïohjam, 90 persen ïa ki kam yn mang kyrpang ha ki kam bym ïadei bad ki kam pynïaid ophis bad 50 person ha ki kam ba dei peit ha ophis.
U Myntri Rangbah u la pyntip ba ki jingpynbeit thymmai ba la tyrwa ki long ban sngap ïa ka jingpyrshah jong ki paidbah nongshong shnong bad ban pynthikna ba ka Aiñ kan pynmyntoi ïa ka jylla, bad ban ïada ruh ïa ka hok jong ki nongshong shnong.
U la ong ruh ba ka Sorkar kan ïai bteng ban ïasyllok bad ki kynhun bapher bapher, kynthup ïa ki nongsynshar shnong, ki kynhun ban pynthikna ba kane ka aiñ kan long ka jingmyntoi ïa ki paidbah bad kan pynthikna ruh ba kan ïada pura ïa ka hok jong ki trai ri trai muluk.
“Kum ka Sorkar, ngi la kut jingmut ban peit shwa ïa ka bha ka miat jong ki briew lajong. Ka jingthmu jong ngi ka long ban pynthikna lyngba kane ka Investment Act, ngin dup lah ban khring ïa ki nongseng kam, ki ban pynkha ïa ki lad aikam sha ki briew jong ngi khamtam ïa ki samla bad ban kyntiew ruh ïa ka roi ka par ha ka jylla,” la ong u Myntri Rangbah.
