Shillong, Lber, 11: Ar tylli ki thuk thuk motorbike ki la ïatakhuh paramaki hakhmat ka SBI Main Branch, Shillong ha ka sngi Baar ha ka por kumba 8:10 baje mynmiet.
Ka kynhun lum khubor jong ka Batesi TV kaba la lap markmat ïa kane ka jingjia, ka la shem ba kine ki ar tylli ki thuk thuk ba kynthup ïa ka KTM kaba don ïa u nombar ML05-AD-1094 bad ka thuk thuk NS Pulsar ML05-S-2736 ki la julor bad ki nongniah jong kine ki ar tylli ki thuk thuk ruh ki la mynsaw jur.
Ki Pulit pynïaid kali kiba la wan poi ha kane ka jaka ki la ïarap ban pynkit noh ïa ki arngut kiba mynsaw sha Civil Hospital, Shillong ban ïoh ïa ka jingsumar.
Kat haduh ba la pynmih ïa kane ka khubor, u nongniah jong ka thuk thuk KTM u la kham mynsaw jur bad haduh mynta u dang don hapdeng ka jingbym tip briew, katba u nongniah jong ka thuk thuk NS Pulsar u la shu mynsaw malu mala bad u paralok uba shong lang ha kane ka thuk thuk u la shu lait thaw na ka jingmynsaw.
