Shillong, Lber, 12: Ar tylli ki jingjia shah thang kali ki la jia ha ki ar jaka jong ka nongbah Shillong ha ka por shiteng synnia bad ha ka por mynstep sngi Balang.
Ki runar bym lah satia ban ithuh durkhmat ki la wiangding ïa kawei ka kali Maruti Swift Dzire kaba don ïa u nombar ML05 AB 1290 ha ka shnong Nongmensong, Dong Kadiang, Shillong ha ka por kumba 2:50 baje mynstep.
Katkum ka jingwad jingtip, kane ka kali ba la ingkhong lut na ki bynta ba nakhmat ka dei ba la pyndonkam da ka Meghalaya Infrastructure Development and Finance Corporation Limited (MIDFCL).
Ka kynhun jong ka Forensic Crime Scene Unit ki la pynlong ruh ka jingtohkit kaba bniah bad lum ruh ïa ki sakhi satar na ka jaka ba la wiang ding ïa ka kali.
Ki Pulit ki la pynlong ruh ïa ka jingtohkit kaba bniah ban peit ruh na ki CCTV kiba la pyndait ha ki dukan kiba don marjan bad ka jaka ba la shah thang ka kali khnang ban ithuh durkhmat ïa ki briew kiba donkti ha kane ka kam runar.
Ha kawei pat ka jingjia, ki runar ki bym lah ban tip, ki la wiang ding ïa ka kali Alto 800 kaba don ïa u nombar ML05 K7549 ba la pynieng ha phyllaw jong ka N.F Railway Officers Rest House kaba don ha Lumshatsngi, Laban. Kane ka kali ka dei jong u nongtrei uba trei ha N.F Railway Officers Rest House.
La suba ba ki runar ki la shu kawang da u petrol bom namarba la lap ïa u bilor beer ba la sahkut hapoh ka kali bad ki bynta ba shapoh jong ka kali ki la julor.
Katkum ka jingïathuh jong u trai kali, ka jingshah wiang ding ka kali ka la jia ha por kumba 12:30 baje shiteng synnia bad ha kaba nyngkong u dang pyrkhat ba ka dei ka jingbthei jong ka bording hynrei um shym la poi pyrkhat satia ba kan dei pynban ka kali jong u kaba la shah wiang ding ha ki rurnar.
Ka kynhun jong ka Forensic Crime Scene Unit ki la pynlong ruh ka jingtohkit kaba bniah bad lum ruh ïa ki sakhi satar na ka jaka ba la wiang ding ïa ka kali bad ïa ka snam ba la bit ha ka kynroh ha kaba la suba ba ki runar kiba donkti ha kane ka kam bymman ki la kiew ïa ka kynroh ban kynthih sha ka phyllaw shwa ban wiang ding ïa ka kali.
Kat haduh ba la pynmih ïa kane ka khubor, ki Pulit ki dang pynlong ïa ka jingtohkit kaba bniah bad haduh mynta kim pat ïohkem satia ïa kino kino ki briew kiba donkti ban wiang ding ïa ki ar tylli ki kali.
