Shillong, Lber, 13: U Mission Director jong ka Drug Reduction Elimination & Action Mission (DREAM) u Bah Francis Kharshiing ha ka sngi Palei ha ka sien kaba nyngkong eh u la lum lang ïa ki Rangbah Shnong jong ki shnong bapher bapher ka Sor Shillong ban ïathir ïatai bad ban ïasyllok kumno ban pynduhjait bad ban rat dyngkhong ïa ka jingjyllei jong drug hapoh ka jylla.
Haba kren sha ki lad pathai khubor, hadien ba la wai ka jingïalang u Mission Director u la ong, ba ki bor shnong ki dei ki atiar kiba khlaiñ ban wanrah ïa ka jingkylla ha ka imlang ka sahlang bad u la ong ruh ba ka jingïaphylliew jingmut ka long ban kyntu bad ban ai jingmut sha ki dorbar Shnong ban ym niewbein ïa ki khynnah samla kiba la ngop ha u drok bad ban pynkhlain ïa ki ki kam ïalehkai sports hapoh ki shnong ki thaw khnang ba ki khynnah kin lait na ka jingshah khring ha ki kam sniew kam smeh.
Katba u Superintendent of Police jong ka East Khasi Hills u Bah Vivek Syiem u la ong ba ki Dorbar Shnong nalor ki kam ba ki hap ban peit ïa ka bha ka miat ha ka shnong ka thaw ki donkam ruh ban pynkhlaiñ ïa ki Village Defence Party (VDP) bad ki don ruh ka bynta kaba khraw ban peitngor ïa ka shnong ka thaw haba don kino kino ki jingjia hapoh u pud u sam jong ka shnong.
