Shillong, Lber, 16: Ka Thma u Rangli (TUR) ka la ong ba ka jingkynthoh halor ka Meghalaya Investment Promotion Authrority (MIPA) ka long katkum ki jubab RTI ba ïoh pdiang bad ha kajuh ka por.
Ha u kyrwoh ba la phah sha ki lad pathai khubor ha ka sngi U Blei lyngba ka Convenor Kong Angela Rngad, ka TUR ka la ong, “ka TUR kam shym la pynmi ïa ki ” jingkynnoh bym don nongrim” kumba la kam da u Bah Hynniewta hynrei ka ïasam ïa ki jingtip kiba la pynshong nongrim na ki kot ki sla ba thikna kynthup ïa ki Notesheet ba la ïoh lyngba ka jubab RTI. Ka jingkren jong u Bah Hynniewta ka long ban kynnoh pyrshah ïa ka TUR bad bad ïa ka RTI kaba ngi la pyndonkam ha ki por ba la leit noh bad ha kane ka jingjia ba mynta. Ngi kwah ban kdew ïa ki jingshisha ba kane kam dei shuh ka sien kaba nyngkong ba u Bah Hynniewta un buhrieh ïa ki jingtip bad ngi kwah ban pynpaw ba wat ka State Information Commission ruh ka la maham ïa u ha ka por ba la shong bishar bad ïa ka hukum la bsut ha ka link hokmeghalaya.in ha kaba ïadei bad kane.”
“Ki dulir sorkar ba la pynmih na ka shithi kaba don ïa ka shab jong ka MIPA bad ba la soi hi da u Bah Hynniewta ka pynpaw ba ka MIPA ka dang sdang bad ka la pynlong ïa ki jingïalang kiba ïadei bad ka jingthmu jong ka jaka ha kaba la khot hajir ïa ki tnat treikam sha kane kajuh ka jingïalang. Ki dulir sorkar halor kane ki kynthup ïa ki jingujor na ki kynhun seng kiba pyrshah ïa ka jingshim jaka ïa kiba la bsut ban tip paidbah ha ka hokmeghalaya.in,”la pyntip ka TUR.
U Bah Hynniewta u ïai bteng ban pynmih ïa ki jingkren lamler ban ong ba ki jingtreikam ka MIPA ki don ha ka rynsan paidbah. Kane ka dei kaba thok bad kaba ïalam bakla. Ka website kam shym pynpaw eiei bad ka jingtreikam jong ka MIPA ka long shisha thylli bad kaba la pynlong ïa ngi ban buh ïa kane ka jingshisha ha ka jingkyrpad banyngkong ha ka jingpan ïa ka RTI. Ïa ka bynta jong kane ka jingkyrpad la bsut lang hangne,” ong shuh shuh ka TUR.
“Ka khubor ba la pynmih da u Bah Hynniewta ka paw shai ba ka don jingthmu kaba sniew ban buhrieh ïa ki jingpyrshang jong ki nongshong shnong ban pyndonkam ïa ki jingtip ba la ïoh lyngba ka RTI na ka bynta ban pynthikna ïa ka jingshai bad ka jingtreikam kaba khuid ha ka synshar ka khadar. Kum ki nongshong shnong kam dei tang ka hok ba kongsan jong ngi hynrei ka kamram ba kongsan jong ngi ban pyndonkam ïa ki rukom treikam jong ka aiñ ba kin shah skhor bad ban ïashim bynta ha ka jingsynshar,” la ong shuh shuh ka TUR.
