Shillong, Lber, 18: Katkum ka jingbthah jong u Myntri Rangbah ka Jylla Conrad K. Sangma hadien ka jingïashong jingïalang bad ki ophisar jong ka tnat Forest and Environment, la bthah ïa ka Meghalaya State Pollution Control Board (MSPCB) ban leit sorjamin bad ban tohkit ïa baroh ki karkhana kiba don ha Byrnihat kiba hap shapoh u pud u sam jong ka jylla Meghalaya.
Ïa ka jingleit lum jingkheiñ la bthah ïa ka MSPCB ban pyndep hapoh ka por kaba tang shi taiew bad ban phah ïa ka kaiphod sha ka tnat Forest and Environment.
Dang shen u Myntri Rangbah u ladep pynpaw ha ka Dorbar Mang Tyngka jong ka Assembly ha kaba ïadei bad ki kaiphod bad ong ba la donkam ïa ka jingïatreilang hapdeng ka Sorkar Meghalaya bad ka Sorkar Assam.
U Myntri Rangbah u la phah ïa ka shithi sha u Myntri Rangbah ka Assam na ka bynta ban shim ïa ki sienjam ba kongsan namarba bun na ki karkhana ba pynmih ïa ka tdem jaboh kiba hap ha ka Red Category ki don sha ka bynta jong ka jylla Assam.
Ladep bthah ruh ïa ka Assam State Pollution Control Board (ASPCB) ban shimkhia bad ban pynlong ïa ka jingtohkit bad ka jingjurip. Ha kajuh ka por, ka Sorkar Meghalaya ka la shim ïa ki lad ki lynti bapyrkhing ban peitngor ïa ka jingpynmih tdem jaboh da ki karkhana kiba don hapoh ka jylla Meghalaya.
