Shillong, Lber, 19: Ki nongïalam jong ka KSU Bengaluru Unit ki la leit jngoh bad ai mynsiem ïa ki heprit na ka jylla Meghalaya kiba la shah sumar hadien ba ki la kem pang na ka jingbam ba la sah.
Ka seng ka la ai ka jingïarap ïa ki heprit kiba donkam ha kum kane ka jingjia ba sngewsih.
Kum ban shu pyntip hangne ba ka jylla Karnataka ka la mad ïa ka jingjia ba sngewsih ha kaba ki khynnah ba pule ha Gokula Vidya Samsthe ha Malavalli, Mandya district, ki la kem pang hadien ba ki la bam ïa ka jingbam kaba la sah. Kane ka la lam shaduh u pud ba arngut ki khynnah pule na Meghalaya kiba la tip kyrteng kum u Khrehlang Khongtani na ka shnong Lyndem, Pynursla, East Khasi Hills bad u Nemebantei Marweiñ na ka shnong Sohparu, West Khasi Hills ki la duhei ïa la ka jong ka jingim.
Ha kane ka jingjia ki don kumba 120 ngut ki khynnah kiba la ïoh pang hadien ba ki la bam ïa ka jingbam kaba la pynkhreh ha kawei ka hotel ha Malavalli. Kine ki kynthup ïa ki 40 ngut ki khynnah skul jong ka Gokula Vidya Samsthe, ha kaba 24 ngut ki khynnah skul ki dei na Meghalaya.*
Baroh ki khynnah kiba la ïohpang ki dang don haka jaka sumar ha Mandya Institute of Medical Sciences bad lai ngut ki dang shah sumar ha ICU bad kiwei pat ki la kham khlaiñ, la pyntip ka KSU ha u kyrwoh ba la phah da u President ka KSU Bengaluru Unit u samla Donboklang Nongphud.
U la pyntip ba ki dkhot jong ka KSU Bangalore Unit manla ka sngi ki leit jngoh ïa ki khynnah Khasi ba thiah pang.
Ha ka jingïasyllok bad ki doktor ka hospital, ki dkhot ki KSU ki la ïoh jingtip ba ym pat long ban ai kino kino ki jingbam ïa kine ki khynnah hynrei tang ka um snepkor.
Ki dkhot ka seng ki la shem ba ym shym la don ban pynbiang ïa ka um snep kor ïa ki nongpang bad kumta marmar la thied ïa ki snep kor ban ai sha ki khynnah ha hospital.
