Shillong, Ïaiong, 04: Ki nongïalam jong ka Dorbar Shnong Wapungskur ki la pynpaw ka jingsngewsih halor ka jingbym bat u Dolloi ka Elaka Jowai Bah Puramon Kynjing ïa ka jingkular kumba la ïakut ban ïakynduh ha ka sngi Thohdieng na ka bynta ban ïakren halor ka jingdawa ban pyndam noh ïa ka jingai No Objection Certificate (NoC) sha ka Om Om Coke kaba thmu ban shna ïa ka Lam Coke Manufacturing Unit hapoh u pud u sam jong ka shnong Wapungskur, East Jaiñtia Hills District.
Kane ka kynhun ki nongïalam shnong ka Wapungskur ki la leit ruh ban aiti da ka jingthoh sha u Chief Executive Member (CEM) jong ka Jaiñtia Hills Autonomous District Council (JHADC) Bah Thombor Shiwat, ha u Deputy Commissioner jong ka East Jaiñtia Hills District u Shivansh Awasthi, ha u Divisional Forest Officer (DFO) ka West Jaiñtia Hills District ban ïakren sani halor ka jingai NoC da ka Dorbar Shnong Mookhep bad u Dolloi ka Elaka Jowai sha ka Om Om Coke.
U Waheh Shnong jong ka Shnong Wapungskur u Bah Postling Dkhar ha u kyrwoh ba la phah sha ki lad pathai khubor u la pynpaw ïa ka jingsngewsih ïa ka jingbym bat kular jong u Dolloi bad u la ïathuh ba ka Dorbar Shnong ka la phah ruh ïa ka jingthoh sha u Waheh Shnong jong ka shnong Mookhep u Bah Denis Siangshai ban dawa ba u dei ban pyndam noh mardor ïa ka NoC ba la ai sha ka Om Om Coke.
Kum ban shu pynkynmaw hangne, ba ki nongïalam jong ka Dorbar Shnong Wapungskur ka la shim ïa kane ka sienjam hadien ba ki leit mih ha ka sngi Palei sha ka ophis jong ka Meghalaya State Pollution Control Board (MSPCB) ban pyndam ïa ka Consent to Establish (CTE) ba la ai sha ka Om Om Coke bad aiti ruh ïa ka dorkhas ha u Myntri ka Sorkar Jylla u Bah Kyrmen Shylla uba long ruh u MLA jong ka Khliehriat Constituency.
