Shillong, ïaïong, 06: Ka Hynñiewtrep Integrated Territorial Organisation (HITO) Shillong City bad Nongthymmai Circle da ka jingïasnohkti lang bad ka Karuna Trust ba la ïalam da u Asst. Director u Dr. Raju Choudhary bad ka kynhun jong u ki la pynlong ïa ka ‘Eye Screening Camp’ ha ka sngi Saitjaiñ na ka bynta ki longïng longsem kiba duna ha ka ïoh-ka kot ïa kaba la pynlong hapoh ka Dorbar Hall jong ka Lapalang.
Ki don kumba 150 tylli ki longïing kiba la ïoh ïa ka jingsumar khmat ei ha kane ka sngi bad kiba la ïoh ruh ïa ki dawai dashin bad ki ïitkhmat.
U General Secretary ka HITO Shillong City samla Balajied Jyrwa u la ong ba ka jingsnohkti lang ka Karuna Trust bad ka Seng ka la long kaba seisoh.
U la ong ba kane ka dang dei tang ka jingsdang kaba rit bad shen ka seng kan sa nang pynïar shuh shuh ïa ka jingshakri sha ki paidbah ban pynpoi ïa ki jingdonkam jong ki paidbah ha ka liang ka jingai jingsumar sha ki shnong-ki thaw.
Ki paidbah kiba la ïoh jingmyntoi ki la pynpaw ïa ka jingsngewkmen bad ka jingsngewnguh ïa ka seng namarba kim donkam shuh ban leit sha ki jaka sumar ban pynlut ïa ka pisa khamtam ba ki wan na ki longïing kiba duna ha ka ïoh ka kot.
