Shillong, ïaïong, 09: Ka Hynñiewtrep Integrated Territory Organization ha ka sngi Balang ka la mudui da ka ejahar pyrshah ïa kawei ka dukan die sha Dairy hadien ba la lap ïa ka jinglehsih bad kaba shu pynïaid khlem ka Trading License.
Ïa ka ejahar ba la ujor sha u Officer in-charge jong ka Rynjah Police Station, ka HITO Shillong City ka la pyntip ba ryngkat bad ki nongïalam jong ka Dorbar Shnong Rynjah ki la pynlong ïa ka jingjurip ha ka Lah Sngi u Blei ïa ka Trading License bad ïa ka jingleh khuid leh suba jong ki dukan kiba don hapoh ka jylli jong ka shnong Rynjah.
“Ha ka jingjurip, ngi la lap ïa ka jinglong jingman jong kawei ka dukan die sha ba la ai kyrteng Rajshree, kaba hap hapoh u pud u sam treikam jong phi ha Rynjah. Ngi la lap ba kane ka dukan kam long satia kaba leh khuid leh suba bad khamtam eh ha ka koit ka khiah kaba ïadei bad ka jingpynkhreh ïa ki jingbam ba la die ha kane ka dukan,” la ong ka seng ha ka ejahar.
Da kaba ai nuksa ïa ka jingjia ba dang shen ha ka jylla Karnataka, ha kaba arngut ki heprit na ka jylla Meghalaya ki la duhei ïa la ka jong ka jingim hadien ba ki la bam ïa ka jingbam ba la sah, ngi ngeit skhem ba phin leh eiei ban khanglad ïa kino kino ki jingjia ba sngewsih hapoh ka thaiñ jong ngi,” la bynrap ka ejahar.
“Shuh shuh, ngi kwah ban pyntip ba u trai jong ka dukan u la pynïaid ïa ka dukan khlem ka Trading License kaba biang bad um don hi ruh wat ïa ki dulir kiba biang na ka bynta ki nongtrei kiba trei ha kane ka dukan. Kane ka jingleh bym suidñiew ym tangba ka buh ïa ki paidbah ha ka jingma ïa ka koit ka khiah hynrei ka long ruh kum ka jingpynkheiñ ïa ki kyndon ba donkam ban ïada ïa ka jingma jong ka jaidbynriew jong ngi,” ong shuh shuh ka seng bad kyntu ïa ki Pulit ban pynlong ïa ka jingtohkit kaba bniah bad ban shim ïa ki sienjam ba tyngeh katkum ki kyndon aiñ pyrshah ïa u trai dukan.
