Shillong, ïaïong, 09: Ka Mawkyrwat District Cycling Association ka la pynkup burom ïa u samla Kevin Lyngdoh Sangriang ryngkat ka jingaisngewbha da ka momento bad ka song pisa ba la noh synñiang da ka tnat Planning hadien ba une u samla u la lah ban wanrah ia ka nam bad ka burom lyngba ka jingjop jong u ha ka jingiakob ñiah saikil ba la tip kum ka 21st National Mountain Bike Championship 2025 kaba la long ha Morni Hills jong ka jylla Haryana dang shen.
Ka jingkynkup burom jong ka Mawkyrwat District Cycling Association ia u samla Kevin ka long hadien ba u la lah ban ioh khur ar tylli ki takma ksiar ha ka Cross Country Time Trial bad ha ka Cross Country Olympic.
Ha ka jingpynkup burom ia une u samla, la sakhi lang da u Deputy Commissioner jong ka South West Khasi Hills District u Bah B. Mawlong uba la long kum u kongsan, u President jong ka South West Khasi Hills District Sports Association u Bah H.S. Diengdoh, u President jong ka Mawkyrwat District Sports Association u Bah Ambrose Thongni bad ki bahaïing hasem jong u samla Kevin.
