Shillong, Ïaïong 10: Ka Prof Sharon M Sungoh ka la iehnoh na ka kam Pro-Vice Chancellor ka North Eastern Hill University (NEHU) Shillong Campus.
Ha ka shithi ba la phah sha ki bor ba dei khmih ka Sungoh ka la ong,ba na ka daw ka jinglong jingman bad ka kynrum kynram ha ka University bad ka jingdawa jong ki nongtrei, ki samla pule kan long kaba eh ba dang treikam kum ka Pro-Vice Chancellor jong ka NEHU.
“Halor kine ki daw baroh nga kwah ban iehnoh ïa kane ka kam pro vice chancellor bad ban treikam pat kum Vice-Chancellor (Incharge) na ka jinglong next senior most professor, katkum ka Status 2(A)(5)(i) jong ka University, kiba dei ban treikam mardor,” ka la thoh.
Ka Prof Sungoh ka la pynpaw ruh ka jingeh ba ka la mad naduh ba u Prof Prabha Shankar Shukla u khlem pat wan trei hapoh ka headquarter bad ka jingai bor ïa ka halor ka pisa pilaiñ ka long kaba khim palat ban peit ïa ki kam ki jam jong ka University
Ka la ong ba ka School Board meeting jong ka University ki la dep kut bad dang ap ïa ki jingmynjur jong ka Academic Council/Executive Council ha kaba ka la ong ba kam don ha ka kyrdan bad ka bor ban khot ruh ïa kane ka jingïalang.
“Ki Admission na ka bynta ki samla pule kiba thymmai kan long ha kane ka snem pule ka ban wan, kumta ka donkam ban shim ïa ka rai kaba donkam ha kaba ïadei bad kane ka jingeh kaba don mynta ha shwa ba kan long dier por,” ong ka Prof Sungoh.
