Shillong, ïaïong, 10: Ka Deputy Commissioner (Supply), East Khasi Hills District ka la bthah ïa baroh ki nongtrei sorkar lane ïa kino kino ki dkhot jong ka iing, kynthup ruh ïa ki nonghikai skul Deficit bad Adhoc, kiba trei ha sor bad nongkyndong, kiba don ïa ka NFSA Ration Card (PHH ne AAY), ban aiti noh ïa ki Ration Card sha ka ophis jong ka Deputy Commissioner (Supply), East Khasi Hills District hapoh ka 30 tarik, mynta u bnai namarba kim deihok katkum ki kyndon ban shah kynthup hapoh ka NFSA.
Ka DC ka la maham, lada lap ïa kino kino ki bym kohnguh ïa kane ka jingbthah, kin shah pynshitom katkum ki kyndon jong ka aiñ.
Amlarem: Ka ophis jong ka Sub-Divisional Officer (Supply), Amlarem Civil Sub-Division, Amlarem ka la pynbna paidbah katkum ka National Food Security Act (NFSA) 2013, baroh ki nongtrei Sorkar kiba dang bat ïa ki Ration Card ki hap ban aiti noh ïa ki Ration Card.
Ka Sorkar Pdeng ka la bthah ïa baroh ki nongtrei Sorkar kynthup lang ïa ki nonghikai Deficit bad Adhoc ha ki jaka sor bad nyngkyngdong kiba dang bat ïa ki NFSA Ration Card (PHH lane AAY) ba kin leit pynphai noh ïa ki khnang ban pyntikna kiba ïoh jingmyntoi ki dei tang ki longïing baduk, kiba bylla sngi bad kiba don jingduna ha ki dkhotmet.
Ïa ki Ration Card dei ban leit aiti ha ka ophis Sub-Divisional Officer (Supply), Amlarem Civil Sub-Division, hashwa ka 30 tarik u Ïaïong, 2025. Kiba leh pyrshah hapoh ka por ba la buh ki lah ban shah pynshitom katkum ki kyndon aiñ.
