Shillong, Ïaïong 10: Ka Khasi Students’ Union hapoh ka jingïalam u Samla Lambokstarwell Marngar, President; Samla Biangbor L Paliar, Vice President; Samla Reuben Najiar, AGS bad kiwei kiwei ha ka step sngi Palei ki la kynduh ïa u Dr. Ricky A. J Syngkon, MP jong ka Lok Sabha na Shillong Constituency ban buh ïa ka dorkhas halor ka kam jong ka NEIGRIHMS.
Ha ka shithi ka Seng ka la pynpaw ki jingleh bor na ka liang u Director jong ka NEIGRIMHS ba thmu ban ïuhroit bad leh shilliang ïa ka hok jong ka jaitbynriew. Na ka liang jong ka Seng ka la kynduh ïa u Director ha 1 tarik u Ïaïong halor bun tylli ki mat jingdawa bad ban pynbeit ïa ki jingkynrum kynram, hynrei na ka liang u Director um shimkhia halor kane ka bynta bad u pynslem khnang ïa ka por ba ka tarik ba khatduh na bynta kane ka kam kan kut noh.
Ki mat kiba kyrkieh kiba ka Seng ka dawa ban pynbeit mardor shuwa ban ïaid shakhmat kane ka thungkam (recruitment) ki long kum ka Age limit (rta ban lah ban apply). Ka Seng ka la pynsngew ba ka rta ba khatduh ba lah ban apply ïa ka kam ha NEIGRIHMS ka long 35 snem ha ki jingïathung kam kiba mynshuwa hynrei mynta ka la pynrit kynsan sha ka 30 snem. Kane kan buh jingeh shibun ïa kiba la khmih lynti ban thep kam hangne nalor ba ki post ba lait ki mih shisien lano khamtam ba la duh katto katne snem na bynta ka khlam Covid ha kaba ym shim don kano kano ka jingthung kam.
Shuh shuh ka Ratio 20:80 na bynta ki shynrang bad Kynthei na bynta ka kam Nurse ïa kane baroh ki hospital kiba dei peit hapoh ka Sorkar India ki bud ïa kane hynrei ka NEIGRIHMS kam shim leh kumta. Ha u snem 2023 da ki spah ngut ki nurse shynrang ki ïoh kam bad tang katto katne ngut ki kynthei ki ïoh. Kine ki shynrang ki wan lut na Rajasthan bad ka Seng ka suba jur ba don jingïadei eiei bad u Director ba ki wanrah lut ïa kine ki briew na shathie. Kine ki nurse kim shim dei kiba tbit bad kumta ka buh jingma ïa ki nongshah sumar bad shibun tylli ki jingujor la ïoh halor kane ka bynta.
Na ka liang ka seng ka la pynpaw ruh ba Experience na ki hospital ba don 50 tylli tam ki jingthiah, na bynta ki GNM nurse, ka NEIGRIHMS ka buh kane ka kyndon bad kane kan pynduh nongbha ïa ki nurse ka jylla kiba trei ha PHC/CHC namar ym nym pdiang ïa ki.
Ka seng ka la ong ruh ban pynlong eksamin offline ha kane ka eksamin ba la dep, ka NEIGRIHMS ka pynlong eksam online bad bun ki samla ki ïoh jaka ban leh eksamin shabar bad kane ka khanglad ïa ki samla khamtam ïa kito kiba wan na ka longïing kaba duk, bad ki computer centre ha jylla ruh ki duna bad yn ym lah ban pynlong eksam ïa baroh shisien leh kumta ka Seng ka dawa ban pynlong eksamin offline.
Ka seng ka la pynpaw ruh ba ka jingduna palat ka reservation na bynta ki ST ka Seng ka dawa ba dei ban pynthymmai ïa ka reservation na bynta ki ST.
Ka seng ka kynnoh ruh ba ka don ruh ka jingthmu na ka liang u Director ba nangne shakhmat ba ka eksamin thungkam kan pynïaid noh na Delhi. Ka Seng ka dawa ba ym dei ban ailad ban leh kumta namar kan wanrah ïa ka jingduhnong bakhraw ïa ki trai jylla.
Na ka liang ka seng haba pynsngew sha u Bah Ricky A J Syngkon ka la ong ba kine kiei kiei baroh ki long kiba suk ban pynurlong lada u Director u mon ban pynbha ïa ka NEIGRIHMS hynrei kaba sngewsih ka long ba um kwah ban pynbha hynrei ban pynjot ïa ka NEIGRIHMS bad um don jingkitkhlieh ïa ka bha ka miat jong ki nongshah sumar hangto. Ka Seng ka ïaleh ban pynbeit ïa kine Ki jingkynrum kynram da kaba ïakren bad ïathir hynrei lada u Director u sngap kuman kumba u leh, na ka liang ka Seng ka nym don lad hynrei hap ban mih madan.
Na ka liang u Dr. Ricky A.J Syngkon u la kular ban tuklar halor kane ka kam bad ban pynurlong ïa ki mat jingdawa jong ka Seng bad shen hi un ïaleh ban khot ïa u Director ka NEIGRIHMS ha ryngkat bad jingïadon ryngkat ka Seng bad pynbeit ïa kine ki jingkynrum kynram.
