Shillong, ïaïong, 15: Hadien ka jingsaphriang ki Receipt khrong pisa ha ka Social Media jong ki 12 tylli eiei ki sengbhalang kiba lum pisa na ki dukan bar jylla na Iewduh, ka Hynniewtrep Achik National Movement (HANM) kawei na ki seng kaba la paw kyrteng ha ka jingdon jong ka Receipt ka la kyntait war ïa kane ka jingkynnoh bad ka la kam ba kane ka dei tang ka buit pynthoh bria jong ki riewshim kabu.
Ha ka jingïakren bad ki lad pathai khubor, u Finance Secretary jong ka HANM Bah Lewin Syiemsad u la ong tang shu ïohi ïa kine ki Receipt ha Social Media, ka Finance Committee ka la lum jingïalang kyrkieh ban shong pyrkhat halor kane ka jingshah pynthohbria kaba la pynjahburom ïa ka kyrteng jong ka seng.
Kumta ka komiti ka la shim ïa ka rai ban wad haban da lap ïa ki riew shim kabu bad lada lap kan leh da kaba tyngeh.
U Bah Syiemsad u la ong ba katto katne snem mynshuwa ki la don kiba kum kita ki briew bad ha ka jingwad bniah jong kane ka seng ka la ïoh bat lai ngut bad ka la aiti ha ki Pulit ban leh ïa kaba donkam.
Ka HANM ka la maham ruh ïa u Youtuber uba la pynmih ha Youtube Channel jong u ïa ka dur jong u President ka seng u Bah Lamphrang Kharbani kumjuh ruh ïa ka lama bad ka shab jong ka HANM.
Ka HANM ka la dawa ïa u trai jong ka Youtube Channel ba u dei ban weng noh hapoh 24 kynta lym kumta ka seng kam banse ban ïaid katkum ki lynti jong ka ain.
Haba pynkut ïa ka jingïakren bad ki lad pathai khubor, ka HANM ka la ong ba kam don por ban leh ïa kum kita ki kam poh kiba pynpohdor ïa ka jaitbynriew hi baroh kawei.
