Shillong, ïaïong, 15: Ka Chairperson jong ka Committee on Empowerment of Women jong ka Meghalaya Legislative Assembly Kong Santa Mary Shylla ha ka sngi Baart ka la leit jngoh ïa ka longiing jong ka Kong Darisha Lyngdoh kaba la duhei ïa la ka jong ka jingim ryngkat bad i khunlung ba dang ar bnai kaba la jia dang shen ha ka shnong Langtor kaba hap hapoh ka Eastern West Khasi Hills District.
Kum ban shu pynkynmaw hangne, ïa ka met jong ka kong Darisha Lyngdoh bad i khunrit ba dang ar bnai la lap na kawei ka jaka pynlang um kaba don ha ka shnong Kynshi , Langtor, ha ka 2 tarik, Lber, 2025 hadien ba kine ki arngut shi kmie shi khun ki la jah rngai naduh ka 1 tarik, Lber, 2025.
Ka Kong Santa Shylla ba la synran lang da ki dkhot jong ka Committee ki la leit jngoh ruh ïa ka jaka ba la shah pynïap ka kong Darisha bad pynlong ruh ka jingsngap jar kaba ar minit kum ka jingsngewlem ïa kine ki arngut ki lanot.
Hadien kane, ka Kong Santa ka la leit pat sa sha Mairang Police Station ha kaba ka la ïakynduh ïa u Additional Superintendent of Police u Bah Pyrkhatlang Suchiang bad ïa u Officer-in-Charge ban shong pyrkhat kam bad ban kylli halor ka ka jingtohkit kaba dang ïaid shakhmat.
Ha kane ka sngi la ïadonlang ki dkhot jong ka Committee ba kynthup ïa u Bah Matthew Beyondstar Kurbah, u Bah Adelbert Nongrum bad u Bah Brightstarwell Marbaniang nalor ka Deputy Commissioner jong ka Eastern West Khasi Hills District ka Kong Anita Kharpor, ki Pulit, u Sordar jong ka shnong Langtor bad ki nongkitkam shnong.
Ka Committee ka la pynpaw ba kan pynïoh ïa ka hok bad ban ïada ïa ka hok jong ki kynthei bad ki khynnah bad ban ai jingkyrshan ruh ïa ka longing kaba la ngat ha kane ka apot.
