Shillong, ïaïong, 15: Ka Green Tech Foundation ha ka sngi Baar ka la maham tyngeh ïa ka Sorkar Meghalaya Democratric Alliance ba kam dei satia ban ktah ïa ka Nongkhyllem Wildlife Sanctuary ka iing shong jong ki mrad, ki dieng ba kordor bad ki kynbat ba bun jait, kaba dang hap hapoh ka Umling C&RD Block, Ribhoi District.
Kane ka jingmaham jong ka GTF ka long hadien ba ka tnat Jngohkai Pyrthei jong ka Sorkar Jylla ka la aiti sha ka E-Factor Experience Limited na ka Jylla Uttar Pradesh ban shna ïa ki Resort ne ki ing basa, ka Sky Walk bad ka Water Sports Zone ha Nongkhyllem Wildlife Sanctuary ha ka jingmang pisa kaba kot T.23.60 klur.
Ka Green Tech Foundation ka la phah ruh da ka dorkhas sha u Myntri ka tnat Jngohkai Pyrthei ka Sorkar Jylla u Bah Paul Lyngdoh ban pynpaw ïa ka jingpyrshah halor kane ka jingwanrah jong ka Sorkar ïa kane ka projek.
“Ngi la thoh ruh sha u Chief Secretary ka Jylla, sha u PCCF ka tnat Forest, sha ka Biodiversity Board bad lada ngim ïoh jubab ngin sa buddien,” ong u Chairman ka GTF u Bah H. Bansiewdor Nonglang ha ka jingïakren bad u nongthoh khubor.
U Bah Nonglang u la ong ba ka jingpyrshah jong ka Foundation ka long nalor ba ka Nongkhyllem ka dei ka Wildlife Sanctuary ne ka jaka ri bad sumar ïa ki mrad, ka dei ruh ka Eco-Sensitive Zone bad ka Protected Area kaba don ki mrad, ki dieng bad ki kynbat kiba long kyrpang.
U la kam ruh ba ka E-Factor Experience Limited ka dei tang ka nongpynïaid ïa ki kam tamasa hynrei kam dei ka kynhun jong ki riewshemphang kaba peit ruh ban ïada ïa ka mei mariang.
“Ka Green Tech Foundation kam pdiang satia ïa kane ka projek ba la wanrah da ka Sorkar ban pynthud bad pynwit ïa ki mrad kiba im bad sah ha ka khlaw ha Nongkhyllem bad kumba ka long mynta ka Nongkhyllem bad ka Narpuh Wildlife Sanctuary ki ladei lypa ki Eco Sensitive Zone ba la pynbna da ka Ministry of Environment Forest and Climate Change, ka Sorkar India ha u snem 2017 kaba mut ba kim dei shuh ki jaka kiba lah ban ktah kulmar,” la bynrap u Bah Nonglang.
“Lada phi ktah ïa ka Nongkhyllem Wildlife Sanctuary, ngin ym shong kli kti. Daleilei ngin ym shah hi ruh,” la maham u Chairman jong ka GTF bad bynrap da kaba phah ïa u kyrwoh sha ka Sorkar Jylla da kaba ong,, “(Sorkar) sngewbha weng noh mardor ïa ka kontrak ba phi la ai sha ka E-Factor Experience Limited. Ngim donkam ïa kine ki kompeni kiba nanbar ban wan leh trai.”
“Lada phi pahuh pisa leh kumba phi leh ha Nan Polok, ngim tuklar. Ka Sohra bad ka Nongkhnum bad kiwei kiwei ki jaka jngohkai ha ka jylla ki donkam ïa ka jingbei pisa kaba heh ban kyntiew ïa ki kam jngohkai pyrthei. Wat tang ïa ka Tourism Policy 2023 ym pat lah ban pyntreikam haduh kine ki sngi khnang ba ki jaka jngohkai pyrthei kin neh bad kin ym jah namarba la bun sa tang ki jaka kiba jaboh, mynta phi mut ban leit ktah sa hangteiï la kynthoh u Bah Nonglang.
“Lada ki (Sorkar) ïohlad ban pynkylla ïa ka Nongkhyllem Wildlife Sanctuary katkum ka jingthmu khlem artatien kan kylla kum ka Biological Park bad ngin duh syndon,” ula ong.
U la pynkynmaw ruh ïa ka hukum jong ka Ingbishar High Court kaba la mana ban pom pathar ïa ki dieng ki siej lait noh tang kiba la jan khyllem bad kiba buh jingma ïa ka jingim briew.
U la ong shuh shuh lada ka Sorkar ka ktah ïa ki Wildlife Sanctuary kiba don hapoh ka jylla ka Foundation kam banse ban ïakhun da ka aiñ ne wat ban mih paidbah sha surok.
