Shillong, Ïaïong, 16: Ka Jaiñtia National Council, Western Zone ka la dawa ïa u Chief Executive Member (CEM) jong ka Jaiñtia Hills Autonomous District Council (JHADC) u Bah Thombor Shiwat ba un tuklar mardor ïa ka jingkyntait jong ki Bank ban ithuh ne ban pdiang ïa ki dulir khyndew ba la register ha District Council kat haduh ba kane ka la pynklumar jingmut ïa ki trai jaka kiba shim ram na ki Bank.
Ka seng hapoh ka jingïalam jong u President u samla Hamehi Bamon ka la dawa ïa u CEM jong ka JHADC ba u dei ban tuklar kham kloi ïa kane ka mat namarba ki trai khyndew kiba kwah ban shim ram na ki Bank mynta ki don hapdeng ka jingkulmar jingmut bad ka khim khait watla ka jingithuh ka District Council ïa ki jaka puta ka dei kaba la pynkup bor da ka Sixth Schedule jong ka riti synshar ri ka ri India ha kaba ka JHADC ka la ai sha ki trai jaka ïa ki kot ki sla kum ki syrnot jong ka Land Holding Certificates, Patta, Buniaj List, ki No Objection Certificate bad ki Non-Encumbrance Certificate, hynrei watla katta ruh ki Bank ki dang artatien bad kyntait ban pdiang bad kim ithuh ïa ki kot jaka jong ki trai jaka kaba pynpaw ba ki Bank kim kheiñkor satia ïa ka bor jong ka JHADC.
“Ka jingbym ithuh jong ki Bank ïa ki kot jaka ka dei kaei kaei kaba buh jingeh haduh katta katta ïa ki trai jaka kiba wad lad ban ïoh jingkyrshan pisa na ki Bank da kaba shim ram bad kaba rejistar ha u Registering Officer,” ong u kyrwoh.
Ka seng ka la kyntu ïa u CEM ban ïakren ïa baroh ki Bank ba ki dei ban ai jingithuh bad ban pdiang ïa ki kot ki sla kiba ïadei bad ki jaka puta ba la ai da ka JHADC.
Ka seng ka ong ruh ba lada kino kino ki Bank ki pyrshang ban pynduh pyndam ïa ka bor jong ka JHADC kin ïakynduh ïa ka jingeh kaba khraw.
Ban ïada ïa ki hok longtrai ïa ki jaka puta bad ki nongshong shnong ha rilum Jaiñtia ka JNC ka kyntu ba donkam ban pynbeit kyrkieh noh khnang ban pynsuk ïa ki trai jaka kiba don ïa ki Land Holding Certificate bad ban pyntreikam pura ïa ka bor jong ka JHADC.
Halor kane, u CEM u la kular ba un shimkhia ïa kane ka mat na ka bynta ka jingbit jingbiang ki paidbah.
