Shillong, ïaïong, 19: Kawei ka longkmie Khasi kaba shong trei bylla ha kawei ka longing ha Nagpur, Maharashtra ka la mynsaw jur na ki bynta jong ka kti kadiang halor ka jingkynnoh ba ka la shah shoh pynshitom beiñ ha ki trai ïing.
Ïa kane ka longkmie la rah noh sha ka jaka ai jingsumar. Da ka jingshimkhia ka KSU, ki Pulit ki la pynsah mynta ïa ka longkmie ha Ladies Hostel/Swadhar Gruh ha Revti Nagar, Beltarodi.
Katkum ka jingïathuh jong u Adviser jong ka Khasi Students Union (KSU) Delhi Unit u samla Wanlam Nongsiej u la ong ba kane ka longkmie ka dei na ki thaiñ bad ka la leit bylla trei bylla shabar jylla la kumba katto katne snem. U la ïathuh ba ha Nagpur, kane ka longkmie ka dei kaba dang shu trei kumba shi bnai eiei.
U la ïathuh ba ka KSU ka la ïoh jingtip halor kane ka jingjia ha ka sngi u Blei ha ka por kumba 7:00 baje mynstep bad marmar ka seng ka la pyntip noh lyngba ka telephone sha u Superintendent of Police ka East Khasi Hills u Bah Vivek Syiem bad sha u Special Police Unit for North East Region (SPUNER) u Robin Hibu ba kin shimkhia ïa kane ka kam.
Kat haduh ba la thoh ïa kane ka khubor, kane ka longkmie ka dang don hapdeng ka jingsumar bad ka jingtohkit ka dang ïaid shakhmat.
U samla Nongsiej u la ong ba ka longkmie Khasi ka la ngat ha kane ka jingshah pynmynsaw ha ka sngi Palei.
“Ka daw kaba ngi ïoh jingtip ka dei ba ka la don lypa hi ka jingdom jong ki trai ha kine ki khyndiat sngi. Ka jingshah ktah kti ka la long shaba palat bad na kata ka daw ngi la shimkhia. Donbok ba ngi ïohi telephone ïa i Bah Vivek bad hadien kata ngi la pyntip pat sa sha u Special Police Commissioner jong ka Delhi u Robin Hibu. Hadien kata, ngi la pan jingïarap na ki Pulit ka Nagpur bad ngin sa ïohlad ban leit shaw,” ula ong.
Katkum ka jingtip haduh mynta, ki trai iing kiba donkti ban pynshitom beiñ ïa ka longkmie Khasi ki la shah rah ha ki Pulit bad ki dang don mynta ha ka kti ki Pulit na ka bynta ka jingtohkit.
Haba kylli, u samla Nongsiej u la ïathuh ba ka jingujor ka la don bad dei na kata ka daw ba ki Pulit ka Nagpur ki la rah sha thanat ïa ki trai ïing ban tohkit.
“Ngin nang ïai buddien halor kane ka jingjia bad ngi kyrmen ba ki bahaïing bad ki bor jong ka aiñ kin leh ïa kaba donkam khnang ba kum kine ki jingjia kin ym jia shuh bad ba ki briew jong ngi ruh kin long kiba husiar haba ki leit trei shabar,” u la ong shuh shuh.
