Shillong, Ïaïong 19: Ka Mahila Pradesh Congress Committee (MPCC) ha ka sngi Thohdieng ka la kyntu ïa u Myntri Rangbah ka Jylla Conrad K Sangma ba un tuklar ha ka ban khang noh ïa ki website phlim khlemakor khnang ban lah tehlakam ïa ki kam bymman pyrshah ïa ki khynnah hapoh ka Jylla khamtam ha kine ki por ba la sdang kynrei ki kam sniew.
Lyngba ka shithi ba la phah sha u Myntri Rangbah u Conrad Sangma, ka President ka MPCC ka kong Joplyn Scott Shylla ka la pynpaw ïa ka jingsngewkhia kaba jur halor ka jingnang ïai kiew ki kam thombor ïa ki kynthei khamtam ki khynnah ha kylleng ka Jylla ha kine ki por.
Ka la ong, “Ki dei ki jingjia kiba la ktah bad kiba la pynkhihwin ïa ka jingsngew jong ka imlang sahlang bad ngi ngeit ba ka jingtuklar ba mardor ka long kaba donkam ha ka kyrdan ki nongthaw aiñ ban leh eiei ïa kawei na ki daw tynrai.”
Na ka liang ka Kong Shylla ka la kam ruh ba ki sakhi ki don bad ki paidbah ki sngewkhia ba ka jingsuk ban ïoh peit ïa ki phlim khlemakor lyngba ki Internet ka la ktah bha ïa ka jingmut jingpyrkhat jong ki samla, kaba lam sha ka jingleh ïa ki kam ba bakla bad kaba sngewsih, kaba lam sha ki kam ba shyrkhei kum ka kam leh beijot bad ka jingïuhroit ïa ka longryngïeng ki khynnah.
Ka la ong, “Kum ka seng kaba peit ïa ka bha ka miat bad ka jingïada ïa ki kynthei bad khynnah, ngi kyrpad jur ïa phi ban shim mardor ïa ki sienjam ha ka ban khang noh ïa ki website phlim khlemakor hapoh ka Jylla Meghalaya.”
