Shillong, ïaïong, 19: Ki paidbah nongshong shnong ka jylla Meghalaya kiba ieit ïa ka jingïalehkai ïakob ñiah kali ha ka sngi Saitjaiñ ki la ïohlad ban sakhi ïa ki sap niah kali da ki nongñiah kali kiba la tbit bha bad shemphang na kylleng ka Ri India, kynthup naduh ki kali ar shaka bad ki kali saw shaka. Nalor kata ki la pyni ruh ïa ki sap niah kali da kaba leh “stunt”
Ïa kane ka lympung ñiah kali kaba la tip kum ka “JK Tyre Powered – Indian Racing Festival: A Carnival of Total Control”, ba la pynlong da ka Meghalaya Motorsports Society ryngkat jingïasnoh kti lang bad ka Directorate General Assam Rifles, Laitkor, la sakhi lang da u Director General of Assam Rifles u Lt. Gen. Vikas Kakhera uba la long kum u Kongsan, ka Deputy Commissioner jong ka East Khasi Hills District ka Kong RM Kurbah kaba la long kum ka symbud kongsan, u Head of Operations ka JK Tyra Motorsports u Hari Singh bad kiwei kiwei.
Ha kane ka jingpynisap niah kali la pynlong ha ka kut jong ka tnat shipai Assam Rifles, kaba don ha ka shnong Laitkor la sakhi ruh ïa uwei na ki snar niah kali uba la tip kyrteng kum u Bah Jayden Pariat uba la niah ïa ka kali Formula – IV.
Ka jingpynlong ïa ka “JK Tyre Powered – Indian Racing Festival: A Carnival of Total Control”, kam dei tang ha kane ka jylla Meghalaya, ha shuwa jong kane, la dep pynlong ruh ha ka jylla Nagaland bad Mizoram bad shen yn sa pynlong ruh sa ha ka jylla Assam bad Sikkim.
