New Delhi, ïaïong, 20: Ka National Central Bureau (NCB) jong ka tnat Pulit ka ri Bangladesh ka la phah ïa ka jingkyrpad sha ka Interpol ban pynmih da ka Red Notice pyrshah ïa ki 12 ngut ki briew, kynthup ïa ka Myntri Rangbahduh ba la shah pynhiar shuki ka Sheikh Hasina.
Ka Hasina, kaba la don 77 snem ka rta, ka la wan phet rieh sha India naduh ka 5 tarik, Nailar, jong u snem baladep hadien ba ki samla pule ki la pynlong ïa ka jingïakhih kaba jur ban pynkhyllem ïa ka Sorkar Awami League’s (AL) kaba la bat 16 snem ïa u lakam synshar ha ka ri Bangladesh hapoh ka jingïalam jong ka Sheikh Hasina.
Ka NCB ka la pynmih ïa kane ka jingpyntip da kaba pynshong nongrim na ki jingkyrpad na ki Kashari bad ki tnat tohkit, la pyntip ka lad pathai khubor The Daily Star, haba sot katkum ka jingkren jong u Assistant Inspector General (media) u Enamul Haque Sagor.
Haba pynthikna ïa kane ha Police Headquarter, u Sagor u la ong, “kine ki aplikeshon ki dei kiba la ujor ha kaba ïadei bad ka jingkynnoh kaba mih ha ka jingtohkit ne lyngba ka case kaba dang ïaid shakhmat.”
Ïa ka Red Notice la ju pynmih da ka Interpol ban ïarap na ka bynta ban thwet bad ban ïohkem ïa kino kino ki briew katba ym lah ban ïohkem ne ban pyntreikam pyrshah da ka aiñ. Ka Interpol ka ju ïarap ban wad ïa ka shong ka sah jong ki nongphet rieh kiba sah shabar ri, bad tang shu ïoh jingtip, ïa ka jingtip ba thikna la phah sha ki bor ba dei peit, la ong ka lad pathai khubor.
Hadien ki taiew ba u Muhammad Yunus u la shimti kum u Chief Adviser jong ka Sorkar bashipor ha ka 8 tarik, Nailar, ka International Crimes Tribunal (ICT) jong ka ri Bangladesh ka la pynmih ïa ka Arrest Warrant na ka bynta ka Hasina bad ïa bun ngut ki Myntri Sorkar, ki heh ophisar shipai bad ïa ki heh ophisar Sorkar halor ka jingpynshitom beiñ bad ka jingpynïap beiñ ïa ki nongshong shnong jong ka ri.
Ha u Naiwieng jong u snem baladep, u ka ophis u Chief Prosecutor jong ka ICT ka la bthah ïa ka Police Headquarters ban pan jingïarap na ka Interpol ban ïohkem ïa ka Hasina bad ïa kiwei kiwei pat kiba la ithuh kum ki birew ba la phetrieh shabar jong ka ri.
Ha ka 21 tarik, Kyllalyngkot, ka Sorkar ba shipor jong ka ri Bangladesh ka la ong ba kan leh shitom ban wanrah ïa ka Hasina na India sha Bangladesh bad ban pan jingïarap ruh na ki ri ka pyrthei lada donkam.
