Shillong, ïaïong, 21: Ka tnat Pule Puthi jong ka Sorkar Jylla lyngba u Commissioner and Secretary ha ka lah Sngi u Blei ka la lum da ka jingïalang jong ki District School Education Officer (DSEO) kynthup ruh ïa ki nongïalam jong ka Meghalaya SSA School Association, ka All Meghalaya School Teachers Assocation bad ka Meghalaya 4th Teachers Assocation ban ïakren sani halor ka jingtyrwa jong ka Sorkar ban shimti ïa ki skul SSA kiba don hapoh ka jylla.
Ha ka jingïakren bad ki lad pathai khubor, u Director jong ka tnat Secondary and Higher Education ka tnat Pule Puthi ka Sorkar Jylla u Bah Banteilang J. Kharshandi u la ïathuh ba ka jingthmu jong ka Sorkar ïa mynta ka long ban shimti shwa nyngkong eh tang ïa ki skul SSA ba la pynïaid da ki Dorbar Shnong katba ïa ki skul SSA ba la pynïaid da ki kynhun Balang bad ki riewshimet kin hap ban ai da ka shithi jingmynjur.
Katba u President jong ka MSSASA Bah Aristotle C.Rymbai u la pyntip ba ka seng ka la ïai ban ïa ka Sorkar ba kan pynjlan shwa ïa ka jingpan jingmynjur na ki nongpynïaid jong ki skul SSA tad haduh ka 15 tarik, Jymmang, 2025 namarba ki dang don ki nongpynïaid jong ki skul SSA ki bym pat sngewthuh bad ki bym pat shai bha ïa ka jingtyrwa ban shimti noh da ka Sorkar ïa ki skul SSA.
Ha kaba ïadei bad ka jingbun palat jong ki khynnah skul kiba pas ïa ka eksamin Secondary School Leaving Certificate (SSLC) ka tnat Pule Puthi jong ka Sorkar Jylla ka la hap ban phaikhmat sa sha ki skul Private kiba kwah ban plie ïa ka Class-XI na ka bynta ka samoi pule jong une u snem 2025-2026.
U Bah Kharshandi u la pyntip ba la bynshet ha ki District School Education Officer (DSEO) ba kin lum jingkheiñ bad ban ai jingtip sha ka Sorkar ïa ka jingkwah jong ki skul Private ban plie ïa ka Class-XI ïa kaba yn sa shim rai da ka Sorkar Jylla ha ka jingïalang Kynhun Myntri kaba ban sa long shen.
