Shillong, ïaïong, 21: Ka ophis SDO Pynursla Civil Sub Division ha ka Lah Sngi u Blei ka la pynmih ïa ka jingpynbna pyntip sha ki paidbah nongleit nongwan na ka daw ka jingpyntrei ïa ka surok ha ki bynta jong ka Lyngkyrdem-Laitlyngkot ha ka surokbah National Highway Shillong-Dawki ka pynlong ïa kane ka jaka ba la kdew ban buh ka jingma na ka jinghap khyndew bad ki maw khamtam na ka jingwan jong ka aiom lyiur.
Halor kane, ka SDO jong ka Pynursla Civil Sub-division Kong E.L. Warjri ka la kyntu ïa baroh ki nongleit nongwan kiba ïaid na kane ka surok ba kin long kiba husiar.
Ban ïada na kino kino ki jingmynsaw la bthah ban kiar ïa ka leit ka wan haba ym da donkam than eh ha ka por bajur u slap ne hadien ka jingjur slap. Dei ban bud ryntih ïa ki Traffic Signal bad ki jingbthah ba la pynmih da ki briew ba la buh khnang ban pynïaid kali jong ka Kompani shna surok.
Ïa ki kali dei ban da niah husiar bad adkar, khamtam ha ki jaka ba long sharing bad jaka ba pyntrei ïa ka surok.
Lada don kino kino ki dak jingtwa ne jinghap khyndew bad jot ka surok dei ban pyntip mardor sha ka ophis Block Development Officer, Pynursla C&RD Block, Pynursla lane Sub-Divisional Officer (C), Pynursla Civil Sub-Division, Pynursla.
Dei ban ryntih ïa ki jingpynbna paidbah kiba shaniah bad ba la pynmih da ka Sorkar na ka bynta kino kino ki jingpyntip ba donkam lane lada don kano kano ka jingkhang ne jingpynïaid ïa ka surok.
