Shillong, ïaïong, 23: Ki bor pynïaid jong ka Balang Catholic ka Shillong Archdiocese ha ka sngi Balang ki la pynbna paidbah ba katkum ka jingpyntip jong u Cardinal Kevin Joseph Farrell ha ka 21 tarik Ïaïong, 2025 ha ka por 9:47 baje mynstep jong ka por ha Rome, u Pope Francis u la khlad noh ha ka por 7:35 baje mynstep katkum ka por ha Rome, kaba dei ha ka por 11:05 baje mynstep ha ka por jong ka ri India. U Pope u la khlad ha ka jaka sah jong u ha Domus Sanctae Marthae, Vatican City na ka daw jong ka jingpang stroke, Coma bad Irreversible Cardiovascular Collapse.
Ïa ka jingkhlad noh jong u Pope Francis la pynshisha da u Cardinal Kevin Joseph Farrell.
Ha ka jingïakren bad ki lad pathai khubor u nongaiktien jong ka Media Commission ka Shillong Archdiocese Bah Bedarius Shylla u la ïathuh ba ka sngi ontep don burom ïa u Pope Francis ka ban long ha ha ka sngi saitjaiñ, 26 tarik, Ïaïong, 2025 ha ka por 10:00 baje mynstep jong ka por ha Vatican, lane 1:30 mynsngi ha ka por jong ka ri India.
Ha ka Jyllaniambah Shillong, u la pyntip ba kan sa don ka Mass Bakhuid ha ka 23 tarik, 24 tarik bad 25 tarik Ïaïong, 2025 ha ka Ïingmane Bah, Laitumkhrah ha ka por 5:30 baje janmiet bad kumjuh manla ka sngi ha ki Parish jong ka Jyllaniam Bah Shillong katkum ka por ba pynbeit ha ki Parish.
Ha ka sngi tep ïa u Pope Francis, ha ka 26 tarik Ïaïong, 2025, yn don ka Mass Bakhuid ha Ïingmane Bah Laitumkhrah ha ka por 10:00 baje mynstep bad ha ki Parish bapher bapher ha ka por 10:00 baje mynstep. Ki parabangeit ki lah ban shim bynta lang ha ka Mass Bakhuid ban tep ïa u Kpa Bakhuid, Pope Francis lyngba ki Youtube Channel bad ha ki Tv ka ban long long ha Vatican ha ka por 1:30 baje mynsngi ha ka 26 tarik, Ïaïong, 2025.
“Ka 26 tarik, Ïaïong ka dei ruh ka dei ruh ka sngi banyngkong jong ki khyndai sngi ka jingïam na ka bynta ka jingkhlad noh jong u Kpa Bakhuid, u Pope Francis. Katkum ka jingthrang u Pope Francis, yn tep ïa u ha ka Ïingmane bah jong ka Maria ha Rome. Ïa ki Kpa bakhuid la ju tep ha Vatican hynrei hadien 300 snem tam yn tep ïa u Pope Francis ha kane ka Ïingmane bah bakhraw ha Rome,” u la ong.
