Shillong, ïaïong, 25: Ka Kashari District and Session Judge, East Khasi Hills District ka la hukum ban set 14 sngi ha Judicial Custody ïa u Bah Simon Shylla, 30 snem ka rta na ka shnong Umlyngka uba la shah kem ha ki Pulit ha ka 24 tarik mynta u bnai halor ka jingdonkti jong u ïaroh ïa ki lehnoh kiba siat ïap im im peit peit ïa ki nongjngohkai pyrthei ha Pahalgam, Jammu & Kashmir mynta ka taiew.
Ka Kashari ka la pynmih ïa kane ka hukum hadien ba ki Pulit ki la tian bishar ïa u Bah Simon Shylla halor ka jingkynthoh ha ka Facebook Account jong u, kaba u la ai kyrteng kum u “Man Shylla ha kawei ka video ba la pynmih da ka Northeast Live News ha kaba ïadei bad ka jingsiat ïap jong ki lehnoh ïa ki nongjngohkai pyrthei dang shen ha Pahalgam.
Ïa u Bah Simon Shylla la kem da ki Pulit ka Special Cell ha ka sngi Palei bad la register case pyrshah ïa u ha Lumdiengjri Police Station hapoh ka Section 113(3)/196(1)(a)/147 jong ka BNS.
Ha kaba ïadei bad ka jingïaroh ïa ki lehnoh da u Bah Simon Shylla, u Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong u la ong, “ki Pulit ki la leh la ka jong ka kamram khlem da pynslem. Ngi sngewkhia bha ïa kaei kaba la jia bad ka jingkynthoh jong u samla ka dei ka jingkren pyrshah ïa ka ri bad kan ktah ym tang ïa ka Meghalaya hynrei kan ktah wat ïa ka ri baroh kawei. Kan pynshlur ruh ïa ki kam runar ruser ki ban jingma ïa ki paidbah nongshong shnong jong ka jylla bad kumjuh ruh ïa ki nongshong shnong ka ri India.”
“Ngi la shimkhia bha ïa kane ka jingjia bad ka jingkyrpad jong nga sha baroh ki nongshong shnong ka jylla bad ka ri baroh kawei ba ngin ieng tylli lang kawei bad ngim dei ban ailad kum ïa kine ki jingjia pyrshah ïa ka ri ba kin dang jia biang nangne shakhmat ha baroh kawei ka ri,” la bynrap u Symbud Myntri Rangbah.
Halor ka jingjia ha Pahalgam, u Symbud Myntri Rangbah ka Jylla u la ong, “ngi la don ka jingïalang bad ki BSF bad ki tnat treikam ka Sorkar Jylla bad Sorkar Pdeng. Ngin pynthikna ba ïa ka jingshngaiñ jong u pud u sam jong ka ri lada mih kino kino jingrung tuh bad rung be-aiñ.”
Haba kylli, u ïathuh ba ka Sorkar ka la ïatreilang bad ki dorbar shnong, ki VDP, ki Pulit, ki shipai BSF bad kiwei kiwei ki tnat treikam ka Sorkar Pdeng. “Ngin pynthikna nangne shakhmat ba ka jingrung beaiñ kan ym jia,” u la ong.
