Shillong, ïaïong, 25: U Assistant Professor jong ka Hindi Department ka skulbah North Eastern Hill University (NEHU) u
Alok Singh ha ka sngi Thohdieng u la mudui da ka ejahar ha ki Pulit ka Mawkynroh Out Post da kaba kynnoh ba u la shah shoh pynmynsaw ha u President jong ka NEHU Students Union (NEHUSU) u samla Sandy Sohtun bad san ngut kiwei pat ha ka janmiet sngi Palei.
Ha ka jingïakren bad ki lad pathai khubor, u Alok Singh u ong ba u President ka NEHUSU bad ki san ngut kiba donkti ki la kynnoh ba u la leh politik ïa kaba u la kyntait ruh mardor ba um don jingtip eiei halor ka jingkynnoh bad ka jingpharep jong ki.
U Alok Singh u la ïathuh bniah ba ha ka sngi Palei ha ka por kumba 4:45 baje janmiet, u President jong ka NEHUSU ryngkat lang bad san ngut kiwei pat kiba donkti ki la khang jubor ïa u hapoh kamra treikam ha ka Department. U la ïathuh ba ha kane ka por u President ka NEHUSU bad ki san ngut ki la ktah kti bad byrngem pynïap da kaba pynap ruh da ka khanshi na ka ryndang jong u.
“Haba nga kylli ïa ka daw, ki shu ong sngap jar shong khop bad ki ong ba nga leh politik. Nga la jubab ba ngam tip eiei ïa kaei kaba ki kynnoh. Ynda ki la phah shong ïa nga ki la kura na khlieh, na ki kjat bad na ki kti haduh ba nga la mynsaw. Na kane ka jingjia ka la pynsyier mynsiem ïa nga. Kum u nonghikai ngam sngew shngaiñ satia ïa la ka jong ka jingim hapoh ka Campus,” la ong u Alok Singh.
Ha ka ejahar, u Alok Singh u la kyntu ïa ki Pulit ba kin leh da kaba tyngeh pyrshah ïa kiba donkti bad ban pynthikna ruh ïa ka jingshngaiñ ka jingim jong u kum u nonghikai hapoh ka skulbah.
Halor kane ka jingjia, ki bor pynïaid jong ka skulbah North Eastern Hills University (NEHU) ba la lamkhmat da ka Vice-Chancellor Incharge ka Prof. S. M. Sungoh ki la pynrem jur halor ka jingshah shoh jong u nonghikai ha ki katto katne ki runar hapoh ka Campus.
Lyngba u kyrwoh, ka skulbah ka la pynthikna ban ai jingïada ïa ka jingim jong ki nonghikai, ki nongtrei bad ki samla pule.
U Public Relations Officer jong ka NEHU u Davidson Pyngrope ha u kyrwoh u la ong, “la pyntip sha ki bor pynïaid ba uwei u nonghikai jong ka skulbah la kynnoh ba u la shah ktah kti ha ki katto katne ngut ki runar. U lanot u la ujor da ka ejahar ha Mawkynroh Police Outpost. Mynta kane ka kam ka la don ha ka kti jong ka tnat Pulit bad ka jingtohkit ka la ïaid shakhmat.”
“Ka skulbah kan sa thaw da ka Inquiry Committee ban tohkit halor kane ka kam. Ngi kyntu ïa ki nonghikai, ki nongtrei bad ïa ki samla pule ban pynneh ïa ka shongsuk shongsaiñ hapoh ka skulbah,” la ong u kyrwoh.
