Shillong, Ïaïong, 26: Ka Meghalaya Commercial Truck Owners and Driver Association (MCTO&DA) kaba long ka kynhun jong ki trai bad ki nongñiah trok ki la pynpaw ïa ka jingsngew khia kaba jur halor ka jingkhang jong ki bor synshar ka East Khasi Hills District ban ïaid lyngba na ka Mawmaram-Lad Umsaw.
Da ki phew tylli ki trok ki la sahkut ha ka shnong Mawmaram hadien ba ka Deputy Commissioner jong ka East Khasi Hills District ka Kong R.M Kurbah ka la pynmih da ka hukum ban ym shah shuh ïa ki trok kiba kit palat khyndai ton ban ïaid lyngba na ka surok na Mawmaram sha Mawlyndep.
Ha ka jingïakren bad ki lad pathai khubor hadien ba la wai ka jingïalang kaba la long ha Laitkor, East Khasi Hills District, u President ka seng u Bah Moslander Marngar u la ong, “ka jingkhang ïa ka surok Mawmaram-Lad Umsaw ka la long ka jingduhnong ïa ngi ki trai kali bad ka wanrah ïa ka jingeh ka bym shai hapdeng jong ngi.”
“Na ka liang jong ka sorkar ka la shu pynmih ïa ka hukum ba ki kali kiba ïaid na kane ka surok ka jingkhia ka dei ban long tang 9 ton,” u la ong bad bynrap, “lada phi ong ban ïaid tang 9 ton ka kali ha surok, ka kali aiu kaba lah ban ïaid tang 9 ton wat ka kali thylli ruh kam lah shuh ban ïaid tang 9 ton. Ki kali jong ngi kiba 6 shaka ki la poi sha ka 8-9 ton.”
“Kane ka surok ka long u budlum jong ki trok kiba kit mar na Eastern West Khasi Hills, na South West Khasi Hills, na West Khasi Hills, ki bynta jong ka East Khasi Hills kum sha Sohra, Pynursla bad Mawngap ka long ha kaba kit ïa ki markhaïi ne ki marbam jong ki paidbah,” la ong u Bah Marngar.
“Naduh ba la khang ban ïaid na jingkieng Umïam dei tang kane ka surok kaba pynlyngkot ïa ka leit ka wan jong ki kali kit mar. Lada phi kheiñ ïa ka jingjngai ban phah ïaid na Damsite ban mih tang haduh 7mer ka la long kumba ngi ïaid biang na Damsite sha Byrnihat ar sien ïaid. Lada ngi ohdor ïa ka bai kit ar shah kane kan ktah hi ïa u paidbah,” u la bynrap.
“Ngi la pyrshang ban leit ïakynduh ïa u Myntri ka tnat Transports hynrei ngim shym la ïakynduh hynrei ngi la pyrshang ban ïakynduh ka Deputy Commissioner, ïa u Superintendent of Police bad ïa u Chief Engineer ka PWD hynrei ngim shym la ïakynduh. Kumba ka long mynta ka jingkhang ïa ka surok haduh mynta kam pat long satia kaba shai,” la pynpaw u President ka MCTO&DA.
Haba kynthoh ïa ka jingtuklar jong kawei ka sengbhalang ïa ka jingshah khang lynti ki trok ha ka shnong Mawmaram, u President ka MCTO&DA u la ong, “mynta ka Sorkar ïano kan sngap ban ai ïa ka rai. Shwa ba ka Sorkar kan pynmih ïa ka hukum kan bha ba kan ïasyllok shwa bad ngi ka kynhun ki trai bad ki nongñiah trok. Ka jingeh mynta ka dei bad ngi ki nongñiah trok kiba pyndonkam ïa ka surok kan bha ïa ka Sorkar ban ïasyllok bad ngi hynrei ym ïa kiwei kiwei ki kynhun.”
“Kane ka jingpynmih hukum ka DC ban shah ïaid tang 9 ton na kane ka surok ka pynartatien ïa ngi, imat don mano re mano ba ai jingmut ban shah ïaid tang 9 ton,” la kynthoh u President ka MCTO&DA bad bynrap, “hadien ba la khang ïa ka jingkieng Umïam ka la mih pat sa ka jingkynnoh High Level. Ngi tieng ba ka jingkhang ïa kane ka surok, kan don ka khep bha lada kwah ïaid na kane surok hap siew katta (ka pisa).”
U la ong ruh ki nongñiah trok ki kylla sohpdung haba ka sniew ka surok. “Haba shna ïa ka surok ngim ju ong eiei, katba ynda la sniew pat ka surok ka jingkynnoh ka long beit ïa ki trok. Hato ka jingbakla kam don seh na kiba shna ïa ka surok,” u la buh jingkylli.
“Ngi la rai kut ba lada pynlong ïa kane ka surok kum ka jingkieng Damsite daleilei ruh ngim treh, lada long ban ïaid ngin shu ïaid beit hynrei ban siew pisa ïano ïano ngim siew. Ngi la rai ïa kata,” u la ong.
