Shillong, ïaïong, 27: Da ki spah ngut ki nongshong shnong jong ka Jylla Meghalaya ki la ïalum lang ha Khyndai Lad, Shillong ha ka sngi U Blei janmiet ban thang mombati kum ka dak ban sngewlem ïa ki lanot nongjngohkai pyrthei kiba la duhei ïa la ka jong ka jingim na ka jingshah synreit kuli ha ki lehnoh ha Pahalgam dang shen.
Ka jingthang mombati ba la pynlong da ka Shillong Citizens Forum ka la lum lang ïa ki paidbah nongshong shnong ban pynpaw ïa ka jingïatylli kum ki nongshong shnong ha ka ri bad ban pynrem ïa ki kam pyntriem jong ki lehnoh.
Ha kane ka jingïalang, ki paidbah ki la pyrta ruh da ki sur pynrem pyrshah ïa ki nongleh kam bymman bad kum ki nongshong shnong ki la pynpaw ïa ka sur ba bitar bad sngewlem ruh ïa ki longiing longsem jong ki lanot.
Ka jingïalum lang ha kane ka janmiet ka la pynpaw ïa ka sur jingïatylli kum ki nongshong shnong kiba ieng pyrshah ïa ki kam lehnoh bad dawa ban pynneh ïa ka shongsuk shongsaiñ.
Ki nongïashim bynta ki la dawa ïa ka Sorkar India ban pynïoh ïa ka hok jong ki lanot bad nalor kata ki la dawa ruh ba ki nongleh ïa ka kam bymman ki dei ban shah pynshitom katkum ki kyndon aiñ jong ka ri.
