Shillong, Jymmang, 03: Ka tnat Pule Puthi jong ka Sorkar Jylla ka la wanrah da ka Meghalaya Education Grant (MEG) na ka bynta ban ïarap ïa baroh ki skul kiba ïoh jingkyrshan pisa na ka Sorkar lane ki Grant in Aid School ba kynthup ïa ki skul Deficit, ki skul Adhoc bad ki skul SSA.
Ha ka jingïakren bad ki lad pathai khubor ha ka sngi Saitjaiñ hadien ba la wai ka jingïalang kaba la long ha madan Student, Jaïaw u President jong ka Meghalaya SSA School Associaton (MSSASA) Bah Aristotle C. Rymbai u la ong, “ka la don ka jingtyrwa ba la phah da u Comissioner and Secretary jong ka tnat Pule Puthi Vijay Kumar Mantri hynnin ka sngi Thohdieng halor ka jingpynkhreh jong ka Sorkar ban wanrah ïa ka skhim kaba thymmai ïa kaba la tip kum ka Meghalaya Education Grant ban weng ïa ki kynrum kynram hapoh ka tnat Pule Puthi bad ban kyntiew ruh ïa ka Performance Grading Index (PGI) namar kumba ka long mynta, ka jylla Meghalaya ka la don shatrai duh ha kaba ïadei bad ka Performance Grading Index (PGI).”
“Ha ka Meghalaya Education Grant yn kynthup ïa baroh ki Grant-in-Aid School ba kynthup ïa ki skul Deficit, Deficit Pattern, Adhoc, Fourth Teacher bad ïa ki skul SSA ki bym mon ban aiti ïa ka Management sha ka tnat Pule Puthi jong ka Sorkar,” u la ong bad bynrap, “kin ïoh ïa kijuh ki jingmyntoi ka ban long kumjuh. Ka tnat Pule Puthi ka ai por ïa baroh ki kynhun bapher bapher la ka long ïa ki School Management Committee, ki Sponsoring Body ne kiwei kiwei ba kin ai ïa ki jingai jingmut bad ki jingsngew sha ka Sorkar ha lane shwa ka 31 tarik mynta u bnai.”
“Ynda baroh ki kynhun ki la aiti ïa ki jingai jingmut, ka Sorkar kan sa khot ban ïakren sani halor kine ki jingai jingmut na ka bynta ka jingthmu jong ka Sorkar halor ka jingwanrah ïa kane ka skhim kaba thymmai kaba la ai kyrteng, ka Meghalaya Education Grant,” u la ong.
Shuh shuh u la pyntip ba ha ka jingïalang kum u nongïalam u la pynshai sha ki para nonghikai ïa ki jingïakren bad ka Sorkar ha ki jingïalang kiba la dep.
“Ngi la pynshai sha ki nonghikai halor ka jingpan jong ka Sorkar ïa ki Management jong ki skul SSA ba la pynïaid da ki riewshimet, ki dorbar shnong, ki society bad ki kynhun bapher bapher,” u la ong.
“Ka Sorkar ka la leh ïa kane namarba ka don ka kyndon kaba kdew shai na ka Sorkar India ba kam dei ban don ar tylli ki Management ha kaba ïadei bad ki skul SSA bad ki skul Sorkar bad ka Management ka dei ban don tang kawei bad kata kan dei ka tnat Pule Puthi jong ka Sorkar Jylla katba ka SSA kan shu dei tang ka Funding Agency ne ka jingïarap pisa la ka long ban pynneh ïa ki jingkdew ha ka RTE Act bad ban siew ruh ïa ka tulop jong ki nonghikai SSA,” la pynshai u President ka MSSASA.
