Shillong, Jymmang 03: Ar ngut ki dkhot jong ka seng kieng atiar Hynñiewtrep National Liberation Council (HNLC) ba la shah kheiñ beain ki la shah kem ha ki Pulit ka Ribhoi District halor ka jingdonkti ban dawa pisa beaiñ na ki nongkhaii trai ri bad na ki ophisar Sorkar ha kyrteng jong ka seng.
Katkum ka khubor ba la ïoh na ki Pulit ha ka sngi Saitjaiñ la ïathuh ba ka HNLC ka la pyrshang ban lum pisa beaiñ na ki nongkhaii bad na ki ophisar sorkar hapoh ka Ribhoi District da kaba byrngem ba pynmynsaw lane pyniap lada kim siew ia ka pisa ba la dawa.
Ha kaba ïadei bad kane, ki Pulit ka Ri-Bhoi ki la pynlong ka jingkhynra ha kaba ki la ïoh kem noh ïa uwei u suba uba la tip kyrteng kum u Pyndapbok Makri ha lad Quinine katba u dang shim pisa ba ladep dawa.
Ha ka jingtohkit ki Pulit ki la ïoh kem sa ïa uwei pat uba suba ba u dei u dkhot ka HNLC ïa uba la tip kyrteng kum u Lary Pynkmen Nongshli ha Umtyra. Ia une u kem da ki Pulit jong ka East Jaiñtia Hills.
Ka tnat Pulit ka la ong ba la ïoh jingtip ba ki don ki riewpyrshah ri kiba rieh tngen ha ka ri Bangladesh kiba ïasnoh bad ka HNLC kaba la la shah kheiñ beaiñ ha ka Sorkar India kiba phah ïa ki shithi dawa pisa lyngba WhatsApp sha ki nongkhaii Khasi bad ki ophisar Sorkar da kaba byrngem bad hadien kata ki phah pat ïa ki nongtrei kiba don ha ka jylla ban lum ïa ka pisa.
Kine ki samla kiba shah khring ha kane ka kam ki pdiang ïa ka kum ka lad ban kamai ban ïoh pisa kloi hynrei ïa ka jingthmu la pynpulom noh da ki Pulit.
Ka jingtohkit ka dang iai bteng ban lap ïa kiwei pat kiba donkti lang ha kane ka kam beaiñ.
