Shillong, Jymmang, 04: Ki Pulit jong ka Nongpoh Police Station Ribhoi District kiba la pynlong ïa ka jingkhynra ha ka sngi Saitjaiñ ïa kawei ka dukan ha ka shnong Quinine ryngkat ka jingsynran lang jong u Secretary Shnong bad ki dkhot jong ka Village Defence Party.
Na kane ka dukan ba la long trai da u BahOmiwell Marbaniang, uba sah ha ka shnong Shangbangla, Ri Bhoi District, ki Pulit ki la ïoh kurup kumba 101 litar ka umphniang Petrol bad 84 Litre ka umphniang Diesel, ïa kaba la shu buh beain na ka bynta ban die paidbah, ha kaba ki Pulit ki la kurup noh mardor.
Watla u trai jong ka dukan u la kam ba u la thied da ka pisa ïa kane ka umphniang na ki petrol pump kiba don hajan hynrei la suba ba ka umphniang petrol bad diesel ba la ïoh kurup ka dei kaba shu tuh na ki Mobile Tower bad na kiwei kiwei ki jaka, la ong ki Pulit.
Ha kaba ïadei bad kane, u SP jong ka Ri Bhoi u V. Rathore u la bthah ïa baroh ki trai jong ki Petrol Pumps ban ym die satia ïa ka petrol bad diesel ha ki jerry can bad ha ki bilor namarba ki riew shim kabu ki lah ban pyndonkam bakla ha ki kam beain.
Ka jingdie ïa ka petrol bad Diesel khlem da ïoh bor ka dei kaba long beaiñ, u la ong bad bynrap ba ka tnat Pulit kan sa leh da kaba tyngeh lada lap ïa kino kino kiba ïaleh pyrshah.
