Shillong, Jymmang, 04: Ki bahaïing hasem ki la pyntip sha ki Pulit jong ka Mawkynroh Out Post halor ka jingjah rngai jong u samla Sanborlang Marweiñ, 22 snem ka rta, uba dei u khun jong u (L) Bah W. Diengdoh bad ka Kong Brulina Marweiñ kiba shong basah ha Mawtawar Laitlum, Lad Umjyrmut.
Ha ka ejahar, ki bahaïing hasem ki la pyntip ba u samla Sanborlang Marweiñ u la mih na la ïing naduh ka por 8:15 baje mynstep ha ka sngi U Blei khlem da pyntip shaei un leit bad haduh mynta um shym la wan phai satia sha la ïing.
“Ngi kwah ban pyntip sha phi ba ha kine ki taiew baladep u i sngewsih hynrei um shym la ïathuh ïa ka daw balei u sngewsih nangta ar sngi mynshwa, kata, ha ka 2 tarik, Jymmang, 2025 u la mih na ïing namarba u ong ba um juh shuh ban sah ha ïing hynrei ngi la ïoh bat ïa u ha Mawlai Nonglum ban wan ïalam biang ïa u sha la ïing,” la pyntip ki bahaing hasem ha ka ejahar.
Shuh shuh ki bahaïing ki la pyntip ba ha kane ka kynti ki la pyrshang ban wad ïa u hynrei kim shym la lap satia. La pyntip ba u don ïa u mobile phone ba don ïa u number: 9233720496 hynrei um shym la rah ïa ka mobile ha ka por ba u la mih na la ing ha kane ka step.
Katkum ka jingïathuh jong ki bahaïing, u samla Sanborlang Marweiñ u don ïa ka rong snieh doh kaba byrsaw, ka rynieng 5phut tam eiei, u phong da ka jaket baiong thoh laiñ ksiar na kti, ka T-shirt rong grey, ka patlun traksuit rong iong ba thoh laiñ saw na kynriang bad u ïaid da ka kjat suda. U don ka tatoo ha ka kti ka diang hajan ka ‘tikmie bad u shñiuh ba khap rit.
