Shillong, Jymmang, 04: Ka seng kieng atiar Hynñiewtrep National Liberation Council (HNLC) ba la shah kheiñ beaiñ ka kynnoh ba u Symbud Myntri Rangbah ka jylla uba khmih ïa ka tnat Pynroi Sor Bah Sniawbhalang Dhar u ju bei pisa ïa ka seng mynba u dang long u Myntri hapoh ka Sorkar ba ïalam da ka Seng Congress ha ka jylla.
“Haba u Bah Sniawbhalang Dhar u dang long u Myntri hapoh ka (Sorkar) Congress, u ju bei pisa narieh narieh ïa ka HNLC namarba u sngewthuh mano ba bat shisha ïa ka nongrim. Hynrei mynta, namar ka jingbuaid ïa ka spah bad ka jingkyrkhu jong ka NPP, u pyrkhat ba ym don ba lah ban ktah ïa u,” ong u General Secretary ka HNLC u Bah Saiñkupar Nongtraw ha u kyrwoh ba la phah sha ki lad pathai khubor ha ka sngi U Blei.
Kane ka jingkynnoh jong ka HNLC ka la jia tang hapoh 24 kynta ba ki Pulit ki la kem ïa ki arngut ki dkhot jong ka HNLC na Ri Bhoi bad na East Jaiñtia HIlls District halor ka jingdonkti jong ki ha ka kam dawa pisa be-aiñ.
Haba kyntait ïa ka jingkynnoh u Bah Nongtraw u la ong, “ban shu kynnoh ïa ki riewpaidbah ba lui lui kum ki “lehnoh” ne “ki nongkyrshan” kam dei ka jingpyntreikam aiñ, ka dei ka buit ba shalyndet jong ka sorkar. La pynwandur tang ban pynksan ïa ka jingkem bymhok, ka jingpynshitom beiñ ha phatok bad ka thma pyrkhat pyrshah ïa ki paidbah. Kaei kaba ngi sakhi kam dei ka jingsynshar jong ka aiñ, hynrei ka jingsynshar da kaba pynshitom beiñ kaba long ka atiar ba la jied da kito kiba shaniah ban pynneh ïa ka hok.
U la bynrap ba ka dur jong uwei na kiba la shah kem la sop “bandage” na shyllang kaba kren shai ba kano kano ka jingkyntait, ka long ka jingshisha bym lah ban leh ïa ka jingpynshitom pyrshah ïa u shwa ban rah ïa u sha Kashari.
Kane ym tangba ka dkoh ha ka jingtreikam, hynrei ka dei ka jingleh khnang kaba la thmu ba la kyrshan da ka Sorkar bad ka jingpynkheiñ ïa ka hok jong u hapoh ka Article 21 jong ka Riti Synshar.
