Shillong, Jymmang, 07: Ka Iingbishar Meghalaya High Court ha ka sngi Balang ka la bthah ban thaw da ka komiti kaba thymmai ban bishar halor ka jingai ïa ka No objection Certificate (NOC) na ka bynta ka jingleit pilkrim ba shi sien shi snem sha krem Mawjymbuiñ kaba don ha ka shnong Mawsynram.
Haba pynmih ïa ka hukum hadien ba la shong bishar ïa ka jingmudui ba la ujor da ka Yatra, ka Bench ba la khlieh da u Justice HS Thangkhiew ka la ong, “Ha kane ka jinglong jingman, namarkata kane ka Kashari ka shim ba ka long kaba donkam na ka bynta ki jingkut jong ka hok, ba dei ban thaw ïa ka Komiti kaba thymmai katkum ka hukum 14.08.2024.”
Halor kane, ka Deputy Commissioner ka dei ban tyrwa ïa ki kyrteng ban bishar hakhmat kane ka Kashari, ban thaw thymmai ïa ka komiti. Ïa ka kam dei pyndep hapoh ka por kaba 10 sngi. La buh sngi ban bishar biang ïa kane ka kam ha ka 27.05.2025.”
Ka ïingbishar ha ka hukum ba la pynmih ha ka 14 tarik Nailar, 2024 ka la bthah ba ka Deputy Commissioner, East Khasi Hills District ban tyrwa ïa ki kyrteng jong ki kynhun bad ki briew ne ki nongshim bynta kiba dei ban thaw ïa ka komiti, ban bishar bniah ïa kane ka kam bad ban poi sha ka jingpynbeit kaba lah ban pdiang da baroh.
Ka Iingbishar ka la ong ba hadien kane, la pynmih ïa ka jingpynbna ha ka 21tarik Nailar, 2024, ha kaba ka Deputy Commission ha ka jaka ban tyrwa ïa ki kyrteng ban thaw ïa ka Komti, ka la pynmih ïa ka jingpynbna ha kaba la pyntip sha ki dkhot jong ka komiti ryngkat bad ki kyndon treikam. Hynrei ïa kane la pyrshah da u nongïasaid aiñ na ka bynta u nongujor ha kata ka por namarba kim shym la shah kynthup ha ka Komiti ba la kdew.
U T. Yangi B, AAG ba la ïarap da u H Abraham, GA na ka bynta ki nongkynthoh 1 haduh 5, u la pynpaw ruh ba ym pat don kano kano ka rai kaba la shim ne kino kino ki jingïalang kiba kham bniah jong ka Komiti ba la kdew.
