Shillong, Jymmang, 07: U Chief Secretary ka Sorkar Jylla Bah Donald P. Wahlang ha ka sngi Baar u la shong pyrkhat kam ha Tura, West Garo Hills ban bishar halor ka jingpyntreikam ïa ki skhim bapher bapher ha rilum Garo.
Ki skhim ki kynthup ïa ka Prime Minister Awas Yojana (Urban/Rural), ka projek ba la pyntrei da ka National Highways & Infrastructure Development Corporation Limited (NHIDCL), ka Prime Minister Surya Ghar Muft Bijili Yojana, ka Mission Education, Aadhar Coverage, ka jingpynïasoh Aadhar bad ka NFSA Ration Card, ka MHIS & Health Infrastructures, ka Social Security Schemes hapoh ka tnat Labour (PM-SYN/ PMSBY/ PMJJBY).
Ha kaba ïadei bad ka jingpyni ïa ka jingpyntreikam ïa ka PMAY hapoh ka district, la pynpaw ruh ïa ki jingeh na ka daw ka jingbym don ki surok, ka jingeh jong ki nongïoh jingmyntoi kiba sah ha ki jaka sorkar, ka jingpynïasoh ïa u Aadhaar bad kiwei kiwei ki dei ki mat ba la ïathir ïatai ha ka jingïalang.
Nalor kata, ha kaba ïadei bad ki projek ba la pyntrei da ka NHIDCL ka pyni ba ki la nang tyllun shakhmat ha surok Tura –Dalu, ha surok Dainadubi –Darugre katba ka surok Baghmara kaba pynïasoh bad ka Shillong ka ladep artat. Katkum ka jingpyni jong ki ophisar ka NHIDCL kan shimpor tang hynriew kynta ban ïaid na Baghmara sha Shillong.
Ha ka jingïalang, u Bah Wahlang u la kyntu ïa baroh ki Deputy Commissioner ba kin bishar bniah biang ïa ki skhim ha ki district bad ban buddien halor ka jingpyntreikam ïa ki skhim. Ha kaba ïadei bad ki nongïoh jingmyntoi na ka PMAY, u la ong ba wat kawei ka longiing ruh kam dei satia ban shah iehnoh bad kino kino ki bym don iing don sem hapoh ka jylla ki dei ban ïoh jaka rieh hapoh ka PMAY scheme.
Da kaba pynpaw ïa ka jinglyngkot ka leit ka wan kaba shimpor tang 6 kynta na Baghmara sha Shillong, u la ong ba ki paidbah na rilum Khasi mynta kin ïoh lad ban leit jngoh ïa ka Balpakram National Park, hynrei, u la ai jingmut ïa ki ophisar jong ka tnat Forest ban maramot noh ïa ka Guest House ha Balpakram khnang ba ki nongjngohkai kin dup ïoh sah haba ki leit jngoh ïa ka National park.
Shuh shuh, haba ïathir ïatai halor ka PM Surya Ghar Mukt Bijili Yojana, u Chief Secretary u la bthah ïa ka tnat Planning ban thoh sha ka CM Solar Mission na ka bynta ban pynurlong ïa ka jingbuh thong.
U la kyntu ïa baroh ki Deputy Commissioners jong ka rilum Garo ba kin pynstet noh ha kaba ïadei bad ka jingpynïasoh ïa u Aadhaar khnang ba ki paidbah kin dup ïoh ïa ki jingmyntoi na ki skhim sorkar. U la bthah ruh ïa ki Deputy Commissioner ban tohkit shaphang ka prokram ba la ju pynlong da ka Directorate of Information and Public Relations kum ka Rural Information Campaign kaba ju pynshai paidbah shaphang ki skhim bad ki prokram jong ka Sorkar.
U Chief Secretary u la kyntu ruh ïa ki ophisar ban pynshai bniah halor ka Social Security Scheme bad ka jingkyrshan pisa ba la ai sha ki nongpang hapoh ka MHIS scheme da ka Sorkar Jylla bad pynpaw ruh ba kine ki dei ki skhim kiba la ïarap haduh katta katta ïa ki paidbah baduk ba shitom bad u la kyntu ïa ka tnat ban pynmih paidbah ruh ki jingjop halor ki jingtreikam ki jong ki.
Na ka liang jong u Commissioner and Secretary jong ka tnat Food Civil Supplies and Consumer Affairs, Social Welfare, u Pravin Bakshi u la ïathuh ïa ka jingmyntoi ban pynïasoh ïa u Aadhar ban ïoh ïa ka NFSA bad ïa kiwei kiwei ki jingmyntoi na ki ICDS bad bynrap ruh ba ka jingpynshai paidbah halor ka jingpynrung Aadhar ka la ïaid shakhmat ha ka jylla baroh kawei namarba hadien ka 30 tarik, Jylliew, 2025 kan ym don shuh kano kano ka jingpynjlan ïa ka por na ka bynta ban pynrung kyrteng Aadhar.
U Secretary jong ka tnat Pule Puthi u Swapnil Tembe u la pyni ïa ka jingpyntreikam bad ka jingpyntyllun ïa ki kam jong ka Mission Education hapoh ka Phase I, II bad III ha rilum Garo khamtam ha kaba ïadei bad ka jingshna ïa ki ing skul bad ka jingkyntiew kyrdan ïa ki skul ha ka thaiñ.
U Principal Secretary jong ka tnat Health and Family Welfare u Sampath Kumar u la ïathuh shaphang ka jingpyntyllun ban pyntreikam ïa ka Meghalaya Early Child Development Mission ha ka jylla.
 | ReplyForwardAdd reaction |
