Shillong, Jymmang, 08: Ki Deputy Commissioner jong ka East Khasi Hills, East Jaiñtia Hills bad West Jaiñtia Hills ha ka sngi Palei ki la pynjari da ka korphiw miet ki ban sdang naduh ka por 8:00 baje mynmiet haduh ka por 6:00 baje mynstep hapoh ka jingjngai kaba shi kilomitar na u mawpud ne Zero Line jong ka khappud India Bangladesh kaba hap hapoh u pud u sam jong ka East Khasi Hills District bad West Jaiñtia Hills District.
Katkum ka hukum ba la pynjari hapoh ka Section 163 BNSS, ka Deputy Commissioner jong ka East Khasi Hills ka la pyntip ba ka jingpynjari ïa ka korphiw miet ka long ban khanglad ïa ki mynder na ka ri Bangladesh, ïa ki dkhot jong ki seng kieng atiar, ïa ki nongkhaii tuh bad ïa ki kam runar ruser namar ka jingbym pat ker sainar shiah ha shilynter ka khappud jong ka India-Bangladesh kaba dang hap hapoh ka East Khasi Hills.
Ka Deputy Commissioner ka la ong ba katkum kane ka hukum, la mana ïa ki paidbah ban rung tung ha shilynter ka khappud ha ki kynta ba la pynjari ïa ka korphiw miet, ban ïalum briew palat san ngut shaneng ne ïaid proseshon khlem da ïoh jingbit, ban rah ïa ki tiar pynmynsaw kum ki dieng tylli, ki nar bad ki maw bad ban leh ïa ki kam beaiñ ba kynthup ïa ka jingshalan masi beaiñ, ban shalan tuh ïa ki mar ki mata, ïa u kwai, u tympew, ki dohkha tyrkhong, u sikret, u biri, u slasha bad kiwei ki mar.
Namar ka jingdonkam kyrkieh jong ka kam kane ka hukum kan treikam noh mardor na ka bynta ar bnai naduh ka sngi ba la pynmih ïa kane ka hukum.
U Deputy Commissioner jong ka West Jaiñtia Hills District A. K Singh, u la pyntip ba ka jingpynjari ïa ka korphiw ha khappud ka India-Bangladesh naduh ka por 8:00 baje mynmiet haduh 6:00 baje mynstep ha ka jingjngai kaba 200 mitar na u mawpud ne Zero Line.
Katkum ka hukum la mana ban jam beaiñ sha u pud u sam jong ka ri Bangladesh ne ban rung tuh shapoh u pud u sam ka ri India. Yn ym shah ban ïalum briew palat 5 ngut shaneng ne ban ïaid proseshon be-aiñ bad ban rah ïa ki tiar kiba lah ban pyndonkam kum ki atiar ba kynthup ai ki dieng bad ki maw ha shilynter ka khappud. La khang ban leh ïa ki kam beaiñ ba kynthup ïa ka jingshalan masi beaiñ, ban shalan tuh ïa ki mar ki mata, ïa u kwai, u tympew, ki dohkha tyrkhong, u sikret, u biri, u slasha bad kiwei ki mar.
Namar ka jingdonkam kyrkieh jong ka kam kane ka hukum kan treikam noh mardor tad haduh ban da pynmih hukum da kumwei pat.
U District Magistrate ka East Jaiñtia Hills District u la pyntip ba ka jingpynjari ïa ka Korphiw Miet hapoh ka Section 163 BNSS ka ban treikam naduh ka por 8:00 baje mynmiet haduh 6:00 baje mynstep haduh ka jingjngai kaba 500 metre na u mawpud ne Zero Line ka long ban mana na ka bynta ban ïalum briew palat san ngut, ban rah ïa ki tiar pynmynsaw ne kino kino ki tiar kiba lah ban pynmynsaw kum ki dieng tylli, ki nar rod, ki maw ha ki jaka ba khappud Indo-Bangladesh. La mana ruh ban leh ïa kino kino ki kam khaïi beaiñ ha khappud kum kaba khaïi masi, khaii ia ki tiar ki tar, khaii kwai, tympew, ktung, dohkha, sikret, slasha bad kiwei kiwei ki jait tiar.
U la pyntip ruh ba ki don ki jaka ha khappud kiba don ha East Jaiñtia Hills District ki dei ki bym pat don jingker bad kane kan long pynban ka kabu ba ki briew ki lah ban rung beaiñ khamtam kito kiba thmu ban leh kam sniew kiba don jingïadei bad ki kam pyrshah ri kiba lah ban ïalum hajan ki jaka khappud ha ki por mynmiet bad ban leh ïa kino kino ki kam sniew ba shyrkhei.
“Lada ym lah ban peitngor bha kan lam shaduh u pud ban ym lah shuh ban tehlakam ïa ka jingrung jingmih beaiñ ki briew na ki jaka khappud bym pat don jingker sai nar bad kaba lah ban ktah ïa ka shongsuk shongsaiñ hapoh ka District, ha ka jylla bad ha ka ri hi baroh kawei,” bynrap u District Magistrate.
Kane ka hukum ka treikam mardor tat haduh ban da pynbna da kumwei pat.
 | ReplyForwardAdd reaction |
