Shillong, Jymmang 09: U Myntri ka sorkar jylla uba khmih ia ka tnat Social Welfare Bah Paul Lyngdoh ha ka sngi Thohdieng ula pynbna ba palat 100 ngut ki nonghikai kila pynkhreh ban ïoh ki jinghikai ba kin long ki ‘Counsellor’ hapoh ka 10 bnai, ba kin ïasyllok bad ban weng ïa ki jingma jong u drok na ka jingim ki khynnah pule naduh ba ki dang rit.
Haba ïadei bad kane haba kren sha ki lad pathai khubor, u Bah Paul ula ong ba ka Sorkar lyngba ka Tnad Social Welfare ka la shim ïa baroh ki sienjam ha ka jingpyrshang ban tehlakam bad pynduh jait ïa u drok bad ka jingkynrei ka kam khaiñ drok hapoh ka Jylla Meghalaya.
Na ka liang jong u, ula ong, “Ngi la shim ïa ka rukom treikam kaba bun rukom kaba dang sei soh mynta kumba nga la pynpaw ha ka sien kaba la dep, ba ka jingdih drok ka la hiar kumba 20 percent hynrei kane kam mut ba ngi shongthait noh da kane ka kam.”
Haba ïathuh ba ka tnad ka la kut jingmut ban nang pynkhlaiñ shuh shuh ïa ka jingpyrshang jong ka ban tehlakam ïa ka jingjyllei jong u drok, u Bah Paul la bynrap, “Kawei na ki sienjam ba kongsan kaba ngi la shim mynta ka long ba ngin sdang da kaba pynbiang bad weng ïa kane ka jingma naduh ka rta ba dang lung kaba mut ba ngim ym shah, ngin pyrshang ban ym shah ïa ki samla lud jong ngi ba kin ngop ha ka jingdih droks.”
Na ka liang jong u, u la bynrap, “Halor kane, ka DREAM Mission dang shen ka la ïatreilang bad ka Sanker Centre for Neirology & Mental Health bad ngin ym jied ïa ki jingai jinghikai kiba ka Sanker ka la pynïaid, ha kaba ki nonghikai kin ïoh ïa ki jinghikai kumno ban ïasyllok ïa ki khynnah pule naduh klas II haduh V, khnang ba ki khynnah kin sngewthuh ïa ka jingdonkam ban kiar na une u jingdih pynbuaid.”
U la ïathuh ruh ba ka Sorkar jylla kan bei haduh 50% ïa ka jinglut jingsep ha ka jingpule, kaba long T.10,000 bad ong ruh ba kane ka dei ka sienjam kaba khraw ba ka Sorkar ka la bei tyngka ïa ki nonghikai ki ban long kum ki nongïasyllok naba yn ym lah ban lum lang shi jaka ïa ki khynnah skul, kumta yn ai jinghikai ïa ki nonghikai ki ban long ki nongïasyllok ha la ki jong ki skul.
Halor kane u Myntri u la pyntip ba kawei pat ka sienjam ka long ba kawei na ki Club Phutbol ba heh ka Jylla-ka Shillong Lajong FC ka la ïatreilang bad ka Tnad ban ïalap pyrshah ïa ka jingñiew beiñ ïa kiba dih drok bad ban kren ban khana ïa ki samla ka Jylla.
Kawei pat na ki sienjam ba la shim ka long ba ka tnad ka la phaikhmat bha sha ka jingai jinghikai ha ka Vocational & Skill Development ïa kiba dih drok.
“Ngi la shem ba kane ka buit treikam ka dei kaba jop haba phai sha ka jingkhring pat ïa kito kiba la ngop ha u drok. Ki jingai jinghikai ki la ïaid ha New Hope Deaddiction Centre na ka bynta ki nongdih drok bad shynrang bad kynthei. Ngi la ïatreilang ruh bad ka MSSDS, Don Bosco, ITI bad ngi la tyrwa ban ai jinghikai ha ka Plumbing, Food Processing, Mobile Repair, Photography bad kiwei kiwei,” ïathuh u Bah Paul.
U Director ka DREAM Bah Francis Kharshiing ula ong ba ki skul la pynshlur ba kin jied ïa iwei i nonghikai ban phah sha kane ka jingai jinghikai ba kin long ki Counsellor.
U la ong ba ka course ka long tang ïa 10 ngut ki nonghikai ha ka shi bnai bad kan sa nang kiew. Ha ka 10 bnai, yn sa ai jinghikai ïa palat 100 ngut ki nonghikai. Ka jingthmu hi ka long ba ki nonghikai ba la pyntbit ki lah ban pynsngewthuh bha ïa ki khynnah.
