Shillong, Jymmang 09: U Myntri ka sorkar pdeng uba khmih ïa ka Ministry of Education (MoE) u Dharmendra Pradhan ula bthah ïa ka Tnad ba dei khmih jong ka Ministry ba kan leh ïa kaba donkam halor ka jingdonkam ban thung noh ïa u Vice Chancellor (VC) ba thymmai jong ka North Eastern Hill University (NEHU).
Halor kane, haba pyntip ha ka sngi Thohdieng, u Myntri Sorkar bad nongïalam ka BJP Bah AL Hek ula ïathuh ba u Myntri ka Ministry of Education ula phah ïa ka jubab halor ka shithi ba u phah ha ka sngi Thohdieng.
“U Myntri ka Sorkar pdeng u la pyntip ba ïa kane ka kam la phah sha ka Tnad ba dei khmih ba kan leh ïa kaba donkam,” ula ïathuh.
U Bah Hek u pyntip ba u la thoh shithi sha u Dharmendra ba un tuklar lem halor ka jingdawa jong ka North Eastern Hill University Students’ Union (NEHUSU) bad ka Khasi Students’ Union (KSU) NEHU Unit ban weng noh mardor ïa u Prof P S Shukla kum u VC bad ban thung thymmai noh da uwei.
Halor kane u Bah Hek u la kyntait ban pdiang ba ka Sorkar Pdeng kam shym la shimkhia ïa ki kynrum kynram ha NEHU, da kaba ong, “Da dei ba ki kheiñ sting ïa kane ka kam, kin ym jubab satia ïa ka shithi jong nga”.
