Nongstoiñ, Jymmang, 14: Ka surok ba shipor lane ka Subway ha ka shong Wahlyngdoh kaba don ha ka thaiñ Maweit, West Khasi Hills District ka la shah rong ha ka umsaw namar ka jingther jong u lapbah uba jur ha kine ki sngi.
Ka jingshah rong jong kane ka surok ïaid kali ba shipor ka la pynthut ruh ïa ka leit ka wan jong ki paidbah ka thaiñ Maweit kiba hap ban ïaid lyngba ka Wah.
Kane ka Subway ka dei kaba kongsan bha ïa ki paidbah nongshong shnong ha ka thaiñ Maweit baroh kawei namarba ka jingkieng kaba thymmai ha ka wah ym shym pat la lah satia ban shna pyndep ïa ka jingpyntrei.
La ïathuh ba ka Subway ka la shah rong ha ka umsaw ha ka sngi Baar mynta ka taïew.
Ha ka step sngi Balang la sakhi ba ki kali kiba ïaid lyngba ïa ka Wah ki la sahkut bad shu ïeng sha shiliang surok jong ka wah namarba ym don lad shuh ban ïaid nawei pat nalor ba ka jingkieng thymmai ruh ym pat dep satia.
Kat haduh ba la thoh ïa kane ka khubor ki kali bad ka leit ka wan jong ki paidbah ka dang sahkut.
