Shillong, Jymmang 16: Ki bor synshar jong ka Ri-Bhoi District ryngkat ka jingïatreilang bad ki Pulit ha ka sngi Thohdieng ki la khang khyrdep ïa ka khyrdop khrong khajna kaba la pynïeng beaiñ da ka Khasi Hills Autonomous District Council (KHADC) ha ka shnong Umdihar, harud surokbah National Highway 6.
Kane ka khyrdop khrong khajna ka dei kaba dang shu sdang ban pynïeng.
Tang shu ioh jingtip u Magistrate bad ki bor Pulit ka Ribhoi ki la leit ban khang halor ka hukum kaba la pynmih da u Deputy Commissioner jong ka Ri-Bhoi District.
Kum ban shu pyntip, ha u snem 2023 ki bor synshar jong ka Ribhoi District ki la khang ïa kawei ka khyrdop khrong khajna jong ka KHADC ha kane kajuh ka jaka. Hynrei kaba lyngngoh ka long ba mynta hapoh ka jingialam jong ka Voice of the People Party (VPP) ka KHADC la pynïeng biang sa kawei ka khyrdop ban lum khajna na ki kali kit mar.
U Deputy Commissioner ka Ri-Bhoi District Abhilash Baranwal haba kren sha ki lad pathai khubor u la ong, ka KHADC ne kino kino ki tnad kim lah ban pynïeng khyrdop khrong khajna harud ka surokbah National Highway bad harud ka surok PWD khlem da ïoh jingbit.
Ka jingshim khia jong ki bor synshar ka Ribhoi District ban khang tala ïa ka khyrdop khrong khajna ka KHADC ha Umdihar ka long hadien ba la ïoh pdiang ïa ka jingujor.
