Shillong, Jymmang, 15: Ka Confederation of Meghalaya Social Organizations (COMSO) ha ka sngi Palei ka la phah tular ha u Lat ka Jyla CH Vijayashankar ban thung mardor ïa ka Independent Judicial Enquiry halor ka jingkynnoh sdien phasi jong ka samla Abiel Salchiana Ch Marak, kaba pule Medical ha Regional Institute of Medical Sciences (RIMS), Imphal.
Ha ka shithi sha u Lat, ka COMSO ka la ong, “ngi kyrpad ïa ka ophis ba donburom jong phi ban phah pynlong mardor ïa ka jingtohkit kaba laitluid, kaba khlem ïashah liang ïa kaba yn khmih bniah da ka aiñ halor ka jingïap jong ka. Ka la don ka jingkynnoh ba kam don ka jingbym shimkhia jong ka jaka pule, ïa ka jingshah pyndik ha ka jingmut jingpyrkhat bad ka jingjia kaba suba ba ka don kaei kaei kaba dei ban bishar bniah bad kas jingtohkit kaba khlem ïashah liang.”
Ka COMSO ka la ong ba ka hok jong ka riti synshar ka ri ban im, ka burom, bad ka jingïaryngkat katkum ka Article 14 bad 21 jong ka riti synshar ka ri India, ryngkat bad ki kamram jong ka Jylla katkum ka Article 41 bad Article 46, ki don bynta beit ha kane ka kam.
“Ka Abiel Salchiana Ch Marak ka dei ka samla pule doktor kaba stad bad kaba angnud ha kaba ka jingaiti jong ka ha ka jingpule doktor bad ka jingtrei shitom ha ka pule puthi la ithuh bha da ki paralok bad ka imlang sahlang jong ka. Ka jingïap kynsan ba khlem daw da kaba phasi ïalade hapoh ka jaka pule doktor ba pawnam kum ka RIMS ka la buh ïa u dak jingkylli uba kongsan ha ka liang ka aiñ,” ong ka COMSO.
Ka la kynnoh shuh shuh ba katkum ka jingïohlum malu mala na ki tyllong jingtip bad na ki jingïathuh jong ki para samla ba pule lang ki pynpaw ba ka Marak ka lah ban shah pyndik ha ka bor pyrkhat, ka jingpynbor ha ka jingpule, ka jingshah ñiewbeiñ, bad lehse ka jingbym lah jong ka shlem pule ban ai jingkyrshan lem ïa kane ka samla.
“Ha ka jingbym don ka jingtohkit kaba shai, kaba khlem ïashah liang bad kaba ha khlieh duh, ngi sheptieng ïoh ba kane ka jingjia ka lah ban shu long tang kum ka kam ba malu mala. Kane kan long ka jingpynkheiñ ïa ka hok, khamtam ha ki jingdon jong ki rukom thombor ha ki jaka pule, ka jingshah beiñ jaitbynriew bad ka jingbym lah jong ki bor pynïaid ka jaka pule ban pynneh ïa ka bha ka miat jong ki samla pule kumba la bthah da ka University Grants Commission (UGC) bad ka National Medical Commission (NMC),” la ong shuh shuh ka COMSO.
