Shillong, Jymmang, 15: Ka Kashari ka la ai jamin noh ïa u President jong ka North Eastern Hill University Students’ Union (NEHUSU) u samla Sandy Sohtun uba la shah kem ha ki Pulit ha ka 28 tarik, Ïaïong, 2025 halor ka jingshah kynnoh ba u donkti ban shoh bad ban byrngem pynïap ïa u Assistant Professor Alok Singh uba hikai ha ka Deparment of Hindi ha skulbah NEHU.
Ïa u samla Sandy Sohtun uba la mih na along Shillong District Jail ha ka sngi Palei la pdiang sngewbha da ki nongïalam jong ka KSU Central Body bad ki dkhot jong ka KSU NEHU Unit.
“U samla Sandy u la lait jamin hynin ka sngi (Palei),” ong u General Secretary jong ka NEHUSU samla Toniho Kharsati haba ïakren lyngba ka telephone ha ka sngi Thohdieng.
U la ïathuh ba ka Union shen kan sa ïakynduh ban shong bad ban shim rai halor kane kam.
Kum ban shu pynkynmaw, ki Pulit ka Mawkynroh Outpost ki la register case ïa ka ejahar ba u Assistant Professor Alok Singh u la ujor pyrshah ïa u samla Sandy Sohtun ha ka 25 tarik, Ïaïong, 2025 da kaba kynnoh ba u la shah shoh pynmynsaw ha u samla Sandy Sohtun uba don lang bad san ngut kiwei pat ha ka 24 tarik, Ïaïong, 2025 ha ka por kumba 4:54 baje janmiet ha kaba kim shym la aidaw eiei pynban ki la pharep ba une u nonghikai u donkti ban leh politiks hapoh ka skulbah NEHU.
