New Delhi, Rymphang, 18: Ha ka sienjam kaba thmu ban pynduna ïa ka jingshaniah na ka ri Bangladesh ha ka leit ka wan lyngba ki kali sha ki jylla jong ka thain Shatei Lammihngi, ka Sorkar India ka la pynsted ban shna noh ïa ka surokbah high-speed highway corridor kaba pynïasoh na Shillong sha Silchar ka ban pynïasoh ïa kane ka thaiñ sha ka duriaw bah Bay of Bengal lyngba ka Sittwe Port ba la shna da ka India ha Myanmar.
Ka jingthmu jong ka Sorkar ha kaba shna ïa kane ka surok bah ka long ym tang ban kyntiew ïa ka jingïadei ha ka khaii pateng, hynrei kan long ruh kum ka jingïakhun pyrshah ïa ka jingïohbat jong ka Dha ka ïa ki lynti um jong ka thaiñ.
Ka Sorkar India ka la mang pisa ban shna ïa kane ka surok saw lain ne Four Lane kaba jrong 166.8 kilomitar ha shilynter ka National Highway-6 kan kot haduh 22,864 klur ka jinglut. Knae ka surok kan sdang naduh ka shnong Mawlyngkhung hajan Shillong bad kan sam lyngba sha Panchgram hajan Silchar bad kna pynïasoh ïa ka Ka ladan Multi-Modal Transit Transport Project ha ka ri Myanmar, bad kan long ruh kawei na ki surok ka ban pynïasoh ïa ka thain Shatei Lammihngi bad ka nongbah Kolkata jong ka Jylla West Bengal.
Ynda ladep shna ïa kane ka surok, kan long ka surok khongdong kaba ïarap ban kit ïa ki mar ki mata na Vizag bad Kolkata Port sha ka thain Shatei Lammihngi lyngba ka Sittwe Port, da kaba ïaid lait noh ïa ka Chittagong port ha ka ri Bangladesh. Hadien ba la poi ha Paletwa, Myanmar lyngba ka lynti um, ïa ki mar ki mata yn sa kit pat na surok sha Zorinpui ha ka jylla Mizoram bad nangne yn sa pynpoi sha ki jylla jong ka thain Shatei Lammihngi.
Kham bun na ka bynta jong ka surokbah kaba jrong haduh 144.8 kilomitar kan ïaid lyngba na ka jylla Meghalaya, bad tang 22 kilomitar na ka jylla Assam, bad kane kan pynmyntoi ym tang ïa ka jylla Meghalaya hynrei kan pynïasoh ruh ïa ka jylla Manipur, Mizoram bad Tripura. Lyngba kane ka projek la khmihlynti ba kan pynduna shuh shuh ïa ka leit ka wan na ka 8.5 kynta sah ka 5 kynta.
Ka Ka ladan project ba la bei pisa da ka Ministry of External Affairs kan pynïasoh na ka kad lieng Kolkata port sha Sittwe port ha Rakhine State, Myanmar’. Nangne pat kan pynïasoh sha Paletwa bad sha Zorinpui, ha kaba ka NHIDCL ka thmu ban bteng ïa ka surok sha Lawngtlai bad Aizawl ha Mizoram. Ka Silchar, ha kawei pat ka bynta ba kut jong ka surokbah, kan long kum ka transit point ba kongsan ïa ka jylla Mizoram, Manipur, Tripura bad ka Barak Valley.
U heh ophisar jong ka National Highways & Infrastructure Development Corporation u la ong ba kane ka surok bah ka long kum shi bynta ka Act East Policy bad u la batai ba kane ka projek kan long kum ka jingkynthoh kaba la buh jingkheiñ bha ïa ki jingkren ba dang shen jong u Chief Adviser ba shipor jong ka sorkar Bangladesh, u Muhammad Yunus, uba la kam ha ka por ba u kren ha nongbah Beijing, China ba ka thaiñ shatei lammihngi jong ka ri India ka dei kaba la khang bad ba “ka nongbah Dha ka ka dei tang ma ka, ka nongap ïa ka duriaw na ka bynta ka thaiñ baroh kawei.”
