Shillong, Jymmang, 19: U Myntri Rangbah ka Jylla Conrad ha ka 19 tarik Jymmang, 2025 u la leit jngoh ïa ka Shillong Government College of Engineering, hadien ba ka la ïoh ïa ka jingmynjur na ka All India Council for Technical Education ban pynsdang noh ïa ki Undergraduate Courses ha ka Civil Engineering bad Electrical Engineering na ka bynta u snem pule 2025-26.
Ryngkat ka jingsynran lang jong ki ophisar na ka tnat Pule Puthi bad ka Shillong Polytechnic College, u Myntri Rangbah u la leit jngoh pat sa ïa ka Building jong ka Engineering College bad shong jingïalang ruh bad ki nonghikai jong ka College ban sngewthuh kham bha ïa ki jingdonkam jong ka College.
U la kular ba yn sa pynbeit ïa baroh ki jingeh ha kaba ïadei bad ka jingshna ïa ki jingtei na ka bynta ban pynlong ïa ka Shillong Government College of Engineering kaba treikam kumba la bthah da ka AICTE. Ki nonghikai jong ka Shillong Polytechnic College ki la pyntip ruh ha u Myntri Rangbah ban bei pisa na ka bynta ki jingwad bniah ha ka liang ka Science bad Technology, ha kaba u Myntri Rangbah ka Jylla u la mynjur.
U la ong ba mynta ka Chief Minister’s Research Fellowship (CMRF) ka bei pisa ïa ki jingwad bniah kiba ïadei bad ki kam thohdur bad ka kolshor ha kaba yn sa pynheh shuh shuh ban pynïar ïa ki jingwad bniah ha ka liang ka Science bad Technology.
Ka Shillong Government College of Engineering ka dei Government Engineering College banyngkong eh ha ka jylla bad ïa ka Letter of Approval (LoA) la ai sha u Principal Secretary jong ka tnat Pule Puthi ha ka 30 tarik, Ïaiong, 2025. Kane ka shlem pule kaba don ha ka shnong Kynton Massar, East Khasi Hills District ka dei kaba la pynïasoh ruh bad ka skulbah North Eastern Hill University.
Ïa ka Civil Engineering bad Electrical Engineering yn sdang ban ai jinghikai da kaba pdiang mar 30 ngut ki samla pule na ka bynta u snem pule 2025-26.
