Shillong, Jymmang, 21:Arngut ki ophisar jong ka Ministry of Education kin sa wan sha nongbah Shillong ha ka sngi Palei ban bishar ïa ki jingtreikam jong ka skulbah North Eastern Hill University (NEHU).
“U Additional Secretary in-charge Department of Higher Education, Ministry of Education u Sunil Kumar Baranwal bad u Director Subrat Kumar Pradhan kin sa leit jngoh ïa ka North Eastern Hill University ha ka 22 tarik Jymmang, ban bishar ïa ka jingtreikam jong ka skulbah,” la ong ka shithi na u Under Secretary jong ka Ministry u DK Himanshu ha ka shithi sha u Vice Chancellor ka NEHU ha ka sngi Balang.
La kyrpad ïa ka Sorkar Jylla ban pynbiang ïa ki bor pahara na ka bynta kine ki arngut ki ophisar.
Ha ka 14 tarik Naiwieng, 2024, ka Ministry of Education ka la thaw ïa ka komiti kaba arngut ban tohkit ïa ka jingkynnoh ba don ka jingpynïaid bakla bad ka jingbymlah ban pynïaid hapoh ka North Eastern Hill University (NEHU).
Ïa ka rai la shim hadien ba ka jingshah thngan ba khlem pud sngi ba la pynlong da ka North Eastern Hill University Students Union (NEHUSU) ba la kyrshan lang da ka Khasi Students’ Union (KSU NEHU Unit) kaba la neh haduh shiphew sngi, ban dawa ba dei ban weng noh mardor ïa u Vice Chancellor ba mynta u Prof PS Shukla, ïa u Registrar bad ïa u Deputy Registrar.
Dang shen, ha ka 19 tarik mynta u bnai, u VC ka NEHU u Prof. PS Shukla u la maham ba un leh ïa kaba donkam lada ka Pro Vice Chancellor ka Prof Sherwin Sungoh ka rai ban pynlong ïa ka jingïalang jong ka Academic Council ha ka 21 tarik, Jymmang.
Katkum ka jingong jong u, ka jingïalang “bym long aiñ” jong ka Academic Council ka lah ban buh jingma ïa ka Degree jong ki samla pule.
Da kaba pynpaw ba ka rai jong ka Prof Sherwin kan long kaba don jingïakynad bad kaba be-aiñ, u la kynnoh ba ka Prof Sungoh ka dei kaba la shu pynbna hi kum ka in-charge VC hapoh ka jingpynbor jong ka NEHUTA bad kam don ïa ka itkiar ban khot ïa kum kane ka jingïalang katkum ka aiñ bad ki kyndon aiñ jong ka NEHU. Kano kano ka rai jong kane ka jingïalang kan buh jingkylli halor ki degree jong ki samla pule.
