Shillong, Jymmang, 30: Ki Pulit ka East Khasi Hills kiba la kem ïa u nongleh kam bymman u Himan Gogoi (24 snem) na Jorhat, Assam, ha ka sngi Thohdieng ki la wan rah sha nongbah Shillong ban tian bishar ïa u ha Kashari ka East Khasi Hills District.
Haduh mynta ym pat ïoh jingtip katno sngi ka Kashari ka la phah set ha along ne Judicial Custody ban pynlong ïa ka jingtohkit.
U Himan Gogoi uba donkti ban khyllied skad ban ïoh shondur khlemakor da ka mobile phone ïa kawei ka khynnah skul dang shen ha ka step sngi Thohdieng jong ka taiew baladep ha lynti ïaid kjat na Umsohsun, sha YMCA, Mawkhar, Shillong u la phet rieh sha Assam.
Ka kynhun ba kyrpang jong ki Pulit ba la thaw ha ka 26 tarik mynta u bnai hapoh ka jingïalam jong u Additional Superintendent of Police (Operation) East Khasi Hills u Bah Ivan B. Diengdoh ka la ithuh dur ïa u Himan Gogoi lyngba ka video ba la ïoh ring dur na ka CCTV kaba la saphriang ha ka Social Media.
Da ka jingthwet lang bad ki Pulit ka Lahdoigarh Outpost ka Jorhat la ïohkem ïa u Himan Gogoi na ka iingsah jong ki bahaing jong u ha ka shnong Bamkukurachua kaba hap hapoh ka Jorhat Police station. Nalor kata la lap ba u Gogoi u dei ruh uba don case ha Teok Police Station.
Ki Pulit ki la ïoh kurup ruh ïa ka mobile phone ba u la pyndonkam bad ïa kiwei kiwei ki sakhi satar.
Ïa ka lanot la ithuh bad ha ka jingtohkit la lap ba ka jingjia ka la jia ha ka por kumba 6.35 baje mynstep bad ki Pulit ki la ïoh pdiang ruh ïa ka ejahar bad register case ha Lumdiengjri Police Station.
U SP ka East Khasi Hills Bah Vivek Syiem u la pyntip ba la ujor ruh sa kawei ka ejahar ha Sadar Police Station ha kaba kawei ka khynnah skul ka la ngat ha kajuh ka apot ha ka 19 tarik mynta u bnai hapdeng ka por 7.15 baje haduh 7.30 baje katba ka dang ïaid lynti na ki mawkyndon hajan Dreamland, Police Bazaar bad ïa kane ka case ruh ladep ban register.
Baroh ar tylli ki case la kheiñ kum ki Special Case Report da kaba pynshong nongrim ïa ka jinglong jingman jong ka jingjia, la ong u SP.
