Shillong, Jylliew 05: Kawei ka longkmie ba armet ba tip kyrteng kum ka Kong Pynchei Bareh, ka la khlad noh na kane ka pyrthei ha ka miet 4 tarik mynta u bnai ha Maternal and Child Health (MCH) Hospital Panaliar, Jowai, hadien ka jingshitom phlei snam kaba jur ha kaba la mih ruh ka jingkynnoh ba ka daw ka dei namar ka jingslem ka jingïoh jingsumar.
Ka jingkhlad jong kane ka longkmie ba dang armet ka la pynbitar lut ym tang ïa ki bahaïing hasem hynrei wat ïa ki kynhun seng bapher bapher kiba don ha rilum Jaintia baroh kawei.
Halor kane, ka jingjia na ka liang ki bahaïing ha ka sngi Palei ki la ujor da ka ejahar ha Jowai Police Station pyrshah ïa ka jaka ai jingsumar.
La kynnoh ba ka jingleit jong ki ban ujor da ka ejahar ka dei namarba ka jingbymshimkhia jong ki nongtrei jong ka jaka sumar.
Katkum ka ejahar la ïathuh hadien ba la phah pynkit ïa ka Pynchei Bareh sha Maternal and Child Health Hospital, Panaliar, Jowai la ieh sah ïa ka khlem ka jingsumar kaba biang. La kynnoh ruh ba ki nongtrei jong ka hospital ki la pyntip ïa ka ba yn pynlong ïa ka jingsumar bad ki la ai jingmut ïa ka ba kan nym bam jingbam, hynrei la ieh sah khlem ai jingsumar watla ka don ha ka jingpang kaba jur bha.
La ïathuh ba ka kong Pynchei ka la hap ban bamja ha ka por 1:00 baje noh sngi ha ka 04.06.2025 namar ka jingbym shai halor ka jingsumar jong ka, kumta ha ka por kumba 5:00 baje janmiet, ka la mad ïa ka jingmih snam kaba jur bha bad ka la pyntip sha ki nongtrei jong ka hospital, hynrei ym shym la leh eiei. Hadien kata, ka la khlad noh na ka jingpang ha ka por kumba 9:30 baje mynmiet ha kane kajuh ka sngi.
Ki Pulit ki la leit shimti ïa ka metïap ha ka sngi Palei bad la pynkit sha Ïalong Civil Hospital ban leh ïa kaba donkam.
Ki bahaïing ki la kyrpad ïa ki bor Pulit ba kin shimkhia mardor ïa kane ka kam da kaba pynlong ïa ka jingtohkit pyrshah ïa ka Hospital bad la kyrpad ban pynïoh ïa ka hok jong ka longkmie ba la khlad noh.
Halor kane ka jingjia ba sngewsih, ki sengbhalang kiba don ha ka thain kynthup ïa ka KSU, JSU, JNC ki la pynrem jur bad dawa ruh ïa ka Sorkar ba ka dei ban shim kitkhlieh halor kane ka jingjia.
Ka Seng Kur Bareh East Jaiñtia Hills District hapoh ka jingïalam u President Bah Finelyness Bareh, u General Secretary Bah Jesper Barehlem bad ki dkhot ka Committee jong ka Kur ki la pynrem jur halor kane ka jingjia bad ha ka sngi Palei ki nongïalam ka Seng Kur ki la leit sha MCH Jowai ban ïa kynduh ïa ki bahaïing bad aiti da ka jingthoh ha u Deputy Commissioner ka West Jaiñtia Hills District ban dawa na ka Sorkar Jylla ban pynlong ka jingtohkit halor kane ka jingkhlad ka kong Pynchei Bareh na ka shnong Jalaphet Bri Sutnga (Club Pyrdung) East Jaiñtia Hills District.
Halor kane ka jingjia, u Deputy Commissioner ka West Jaiñtia Hills District u Abhinav Kumar Singh u la thung ïa ka komiti ka ban tohkit halor ka jingkhlad ka longkmie ba dang armet ha Maternal and Child Health Hospital (MCH) Jowai ha ka 4 tarik mynta u bnai.
Ha kane ka komiti la kynthup ïa ka Addl. DC kong B. Blah kum ka Chairman, ki dkhot ba kynthup ïa ka District & Medical Health Officer Jowai Dr. Patricia Shylla, u Paediatrician jong ka Civil Hospital Khliehriat u Dr. Henry Lamare bad Gynecologist jong ka Civil Hospital Khliehriat ka Dr. Sofina Dkhar.
Kane ka komiti kan tohkit naduh ka por ba la pynrung hospital bad ka rukom ai jingsumar. Kan lum jingtip katkum ka SOP jong ki kyndon jingsumar, kan wad jingtip la ka don kano kano ka jingpynslem ne ka jingbym shimkhia na ka liang ki nongtrei jong ka Hospital.
Ha kajuh ka por yn leit tohkit kumjuh ïa ki bahaïing hasem jong ka longkmie ba khlad bad ki nongtrei ka Hospital, ban pyni ïa ki jingai jingmut bad ki lad ki lynti ban ïada ban lait na kum kine ki jingjia.
La bthah ruh ïa ka komiti ban pyndep ïa ka jingtohkit bad ban pynpoi ïa ka kaiphod sha u DC haduh ka 9 tarik mynta u bnai. La bthah ruh ba baroh ki ophisar naduh u Superintendent jong ka MCH hospital bad kiba don bynta baroh ba kin ai ka jingïatreilang kaba pura bad kane ka komiti da kaba ai ïa ki jingtip katkum ka jingdonkam jong kane ka komiti.
